Бахъсэн щIыналъэ администрацэм и унафэщI Балъкъыз Артур иджыблагъэ щыIащ Бахъсэненкэ къуажэм икIи зригъэлъэгъуащ абы щащI спорт комплексым, сабий садым, къуажэдэсхэм я зыгъэпсэхупIэм я ухуэныгъэхэр здынэсахэр.
Лэжьыгъэхэр ирагъэкIуэкI «Къуажэхэм сыт и лъэныкъуэкIи зегъэужьын» къэрал программэм ипкъ иткIэ икIи ар хуэунэтIащ цIыхухэм зыщагъэпсэхун щIыпIэхэр къахузэгъэпэщыным, щIалэгъуалэр спортым дегъэхьэхыным, жылэм зегъэужьыным. 2026 гъэм и кIэм объектхэр ятынущ.
Апхуэдэуи Балъкъызыр щыIащ къуажэм щаухуэ ветеринар клиникэм. Абы ирагъэубыдащ метр зэбгъузэнатIи I03-рэ икIи иджырей мардэм тету зыхуей-зыхуэфIхэмкIэ къызэрагъэпэщынущ. Лэжьыгъэхэр мы гъэм и кIэхэм зэфIагъэкIыну я мурадщ.
Бахъсэн щIыналъэ администрацэм и унафэщIым гулъытэншэу къигъэнакъым зэгъэпэщыжыныгъэ лэжьыгъэхэр етIанэгъэ щызэхаублэну курыт еджапIэ №I-р. Нобэ школым сабий 380-рэ йокIуалIэ.
«Къуажэдэсхэм я псэукIэр егъэфIэкIуэнымкIэ мыхьэнэшхуэ яIэщ нобэ дызэлэжь, къэрал пэхуэщIэхэм къыщыгъэлъэгъуа Iуэхугъуэхэм», - жиIащ Балъкъызым.
Сабийхэм я шынагъуэншагъэр къызэрагъэпэщ
Шэджэм къалэм щаухуа, еджакIуэ 820-рэ зыщIэхуэ иджырей школыщIэм ухуэзышэ гъуэгумрэ уэрамымрэ зыхуей хуэгъэзэн щIадзащ. Псори зэхэту зы километрым щIигъу абы и кIыхьагъщ. Лэжьыгъэхэр ирагъэкIуэкI щIыналъэм и гъуэгу фондым и субсидиемкIэ.
Гъуэгу лэжьыгъэхэм хиубыдэу асфальтрэ бетонрэ зэхэлъу тIуащIэу гъуэгум тралъхьэнущ, иджырей уэздыгъэхэр щыпадзэнущ, къедза щIыпIэхэр зэIузэпэщ ящIынущ.
НобэкIэ асфальтыр зытралъхьэну гъуэгум и лъабжьэр ягъэбыдэ, гъуэгубгъухэр мывэхэмкIэ кърагъэтIылъэкI. Мы гъэм фокIадэм и I-м ирихьэлIэу лэжьыгъэхэр зэфIагъэкIын мурадхэр щыIэщ.
НэIэм щIэт ухуэныгъэхэр
ЕджакIуэ 800 щIэхуэу Тэрч къалэм щаухуэ иджырей курыт еджапIэщIэмрэ Дей къуажэм дащIыхь сымаджэщымрэ щекIуэкI лэжьыгъэхэм зэрыщехъулIэм зыщигъэгъуэзащ Тэрч щIыналъэ администрацэм и унафэщI Хъущт Аслъэнбий. Абы щIыгъуащ районым и прокурор НэгъэцIу Зауррэ щIыпIэ самоуправленэмкIэ щIыналъэ советым и тхьэмадэм и къуэдзэ Алъкъэщ Виталийрэ.
ШколыщIэр яухуэ «ЩIалэгъуалэмрэ сабийхэмрэ» лъэпкъ пэхуэщIэм ипкъ иткIэ. НобэкIэ ухуакIуэхэм блынджабэхэр ялэ, къэухьхэр ягъэув, пэш кIуэцIхэр къращIыкI. Инженер коммуникацэхэр: псыр, хуабэр, электрокъарур, н.къ. къанэ щымыIэу ирашэлIащ, пщэфIапIэри хьэзыр ящIащ. УнэлъащIэхэмрэ обрудованэхэмрэ хуэмурэ кърашалIэ. ЕджапIэм къедза, метр зэбгъузэнатIэ I300-рэ хъу щIыпIэр зыхуей хуагъазэ, плиткэхэр иралъхьэ.
Дей къуажэм щаухуэ сымаджэщри и кIэм нагъэсащ, IуплъапIэр ягъэдэхащ, къэнэжар пэш лэжьыгъэхэрщ. Дызэрыт илъэсым и кIэхэм сымаджэщым и бжэр къуажэдэсхэм къахузэIуихынущ икIи дохутыр дэIэпыкъуныгъэхэр мыбы щрагъэгъуэтынущ цIыху мини 5-м щIигъум.
ХЬЭЩОКЪУЭ Алыдж.
