Кёп болмай Пятигорск шахарда «ТАСС Кавказ» регион  арада бардырылгъан пресс-конференцияда Къабарты-Малкъарны Урунуу эм социал къоруулау министри Тогъузаланы Тахир бла пресс-конференция болгъанды. Аны кезиуюнде къонакъ ведомство тамамлагъан бир къауум магъаналы проект бла   шагъырей этгенди. Ол санда сабийлеге къуралгъан жай солуу лагерьлени, энчи операциягъа къатышханланы юйюрлерине этилген болушлукъну, Уллу Ата журт урушну ветеранларына бла сакъатлагъа социал тутхучлукъланы  юсюнден да билдиргенди.

Ол айтханнга кёре, быйыл республикада Россейни регионларындан келген 7 мингден артыкъ сабий солурукъдула.  Аладан 3 минг чакълысы къыйын болумгъа тюшген юйюрледендиле.  Аны бла бирге быйыл биринчи кере Ямал-Ненецк  автоном округдан сабийле  келликдиле. Ол къауумдан 600 чакълысы санаторийледе саулукъларын да кючлерикдиле.

Бюгюнлюкде регионда алагъа къонакъбайлыкъ этерча  38 организация ишлейди, аладан экиси:  «Звёздочка» санаторий бла Къабарты-Малкъар къырал университетни солуу базасы      сабийлени быйыл биринчи кере аллыкъдыла. Къалгъанланы юсюнден айтханда да,  14-сю бу жаны бла ишлеген  стационар учрежденияладыла, ол санда экиси санатор-курорт объектледиле.  Дагъыда  24-сю  школланы мурдорларында къуралгъан жай лагерьледиле. Ала    КъМР-ни Урунуу эм социал къоруулау,  Жарыкъландырыу эм илму министерстволары  бла кёп жылланы ичинде байламлыкъ жюрютедиле эм кеслерин сынамлы кёргюзтгендиле. 

 Саулай алып айтханда, бу жол 1500 сабий солугъанларындан тышында, саулукъларына да  бакъдырыргъа  онг табарыкъдыла.

Министр къыйын болумгъа тюшген юйюрлени  эм энчи операциягъа къатышхан аскерчилени  сабийлерине   ахча эм субсидия болушлукъланы юсюнден да билдиргенди. Ол санда  алагъа путёвкала 75 процентге учузуракъ берилгенлерин да белгилегенди.

 - Ахча болушлукъну юсюнден айтханда, тюрлю-тюрлю жумушлагъа  74 миллион сом бёлюнюрюкдю, андан 15 миллион сом  путёвкалагъа жетеди,- дегенди Тогъуза улу.

Энчи аскер операциягъа къатышханланы да  иш бла жалчытырча  мадар этиледи.  Аны чеклеринде алагъа  он энчи  жер къуралгъанды. Аллай амал саулукълары бла байламлы чекленнген онглары болгъанлагъа бла сакъатлагъа келиширча этиледи.  

Иш бла жалчытхан ала къыйналмай урунурча онгла къураргъа тийишлиди.  Къыралны жанындан да   къоранчланы бир кесегин жабарча мадар этиледи.

- Сагъынылгъан къауумну иш бла жалчытырча чек салынмайды.  Болгъан сурамгъа кёре  алагъа  жерле мажарыргъа эм хазырларгъа    болушабыз. Андан сора да,  энчи аскер операциягъа къатышханлагъа "Ишчи жерлени ярмаркасын" бардырабыз.

Андан сора да, алагъа регионал тёлеуледен тышында, къырал саулукъларын кючлерча да  путёвкала  береди. Быйыл анга деп    «Грушевая роща» санаторийде 180  путёвка алыннганды,- деп къошханды министр.

Урунуу эм социал къоруулау министерствону болушлугъу бла жай каникуллада школчула болжаллы халда урунурча да мадар этилгенди. Аллай онг  мингден артыкъ сабийге тапдырыллыкъды. Аланы бир къаууму, белгилеп айтханда,  14 жылдан атлагъан жаш адамла   июльдан кеч къалмай устазларыны башчылыкълары бла  мектепледе ишге сюелликдиле.  

Аны бла бирге сабийлени эркинликлери бузулмазча, санитар- эпидемиология мардала сакъланырча, ишчи кюнлери юч сагъатдан кёпге созулмазча эм борчларын толтургъанда, бек къыйналмазча да  эс буруллукъду.  

- Быллай проектни магъанасы эм биринчиден жаш адамны урунургъа юйретиргеди. Алгъан  сынамлары алагъа ахшы себеплик этерикди. Ол санда  бирлешип ишлерге да  юйренирикдиле. Бу жаны бла мектепле бизге не заманда да  болушургъа хазырлыкъларын да чертип айтыргъа сюеме,-   дейди Тахир Магометович.

Магометланы Сулейман.