Эрттенликде солуу паркны шошлугъун чыпчыкъланы жырлагъан  тауушлары  бузады. Ол жырла, алыкъа  паркны жолларында ёрге энишге айланнган адамланы азлыгъы да жюрекге къаллай эсе да бир ангылашынмагъан хошлукъ бередиле.

Нальчик черекни юсю бла  ишленнген жаяу кёпюрде бир кесек сюелип,  сууну баргъанына къарай, аны тынч жырлагъан тауушуна  тынгыласанг да, ол да сейирликди.

«Долинск» санаторийде солугъанла эртденликде эртте окъуна  кёпюр бла  солуу парк жанына ётюп, уллу болмагъан  агъашчыкъны араларында  жаяу жолла бла  айланадыла. Паркга кирсенг а  кёл, аны тёгерегинде да тазалыкъ, ариулукъ, ырахатлыкъ сезиледи. Арыдынг эсенг, олтур да солуу, кёлню суууна къара, угъай, угъай дей эсенг а, кёлде къайыкъладан бирине олтур да, жюз, ыразы эсенг а, жууунур жер да барды.

Эрттенлик  шошлукъ, тизгинлик, тынчлыкъ, ала бары да  жюрекни, кёзню да къууандырадыла. Хауа уа нечик тазады!  Нарт уя тауну  артындан  чыгъып келген  кюн таякъла  паркда назы тереклени бутакъларыны араларындан жарытадыла.     

Эрттенликде  эртте  окъуна  Нальчикни Атажукъ атлы терек бахчасында жашау тириле башлайды. Бирле ёрге, башхала энишге чабадыла, терк, тынч да  атлап барадыла. Гитче Кизиловка тауну аягъында уа  КъМР-де «Лайм» спортклубдан волонтёрлукъ къымылдауну къауумун, шахарчыланы да  кёрюрге боллукъса. Кёлню жагъасында назы тереклени тюбюнде жашил кырдык талада уа Аслан Шипшев башчылыкъ этген «Биринчилени атламларына» кирген жашчыкъла бла къызчыкъла эрттенлик жарауларын этедиле. Курорт кёлню жагъасында уа  йоганы дерслери  бардырыладыла. Ыразы болгъан къошул да,  жарау этип башла. Алайы «Нальчик» курортха солургъа келгенлени бютюн бек сюйген, жаратхан жерлериди.

Андан сора уа «1000 тапка» деген жол бла  ёрге чыгъыу да  башланады. Башына чыгъып, Хасания эл къол аяздача кёрюнеди. Алай Долинскени, Нальчик шахарны да бир кесеклерин эслерге боллукъду. Ариуду тёгерек, бютюнда бусагъатда, хар зат да  чакъгъан, жашиленнген заманда.

Паркны  тизгинли, ариу жоллары бла  Нальчикге солургъа келгенле жаяулай, акъыртын - акъыртын айланыргъа да бек сюедиле. Алагъа ашыгъыр кереклиси жокъду. Бирлери жаяу бара эселе, башхалары  аякъ машинада  жанынг бла озадыла, бирде олтуруп, шахмат, шашка ойнай тургъанларын да кёрлюксе. Аллайланы араларында уа сабийле, абаданла да кёпдюле. Бирле уа Чай юйчюкню къатында китапны алып, терек тюбюнде олтуруп, окъургъа да боллукъдула.

Кёп кере  ишге келе, ишден жаяу бара да, солуу паркны жолларында айланнганланы, олтуруп солугъанланы араларында бир кере да тютюн ичип баргъан адамгъа алыкъа тюбемегенме.

Ингирликде уа шахарчыла, анга жууукъ элледе жашагъанла, солургъа келгенле да Нальчик черекни боюну бла ишленнген жаяу жолгъа тюшедиле. Анда уа сюйсенг дарман суу ич, сюйсенг а,  олтур да,  солу, спорт  керекле бла жарау эт, сабийле ойнарча да аламат жерле бардыла. Ала кюнден кюннге аслам бола барадыла.

Шахарны солуу паркында кюнню не заманында да хычыуунду, бютюнда бек а  эрттенликде…

Холаланы Марзият.