КъБР-м и Парламентым и УнафэщI Егоровэ Татьянэ зи чэзу зэIущIэр мэкъуауэгъуэм и 17-м иригъэкIуэкIащ. 

ЗэIущIэм Тэрч районым и суд IуэхущIапIэ №2-м и зэзыгъэкIуж хеящIэ къулыкъур щы­хуагъэфэщащ Вэрокъуэ Мурат. 
Депутат къалэнхэр иджыблагъэ зыгъэзэщIэн щIэзыдза Быф Альберт хагъэхьащ КъБР-м и Парламентым Экономикэ политикэмкIэ, зыужьыныгъэмкIэ, туризмэмрэ хьэ­рычэт IуэхумкIэ, УхуэныгъэмкIэ, псэупIэ-коммунальнэ IэнатIэмрэ гъэсыныпхъэ-энергетикэ IуэхущIапIэхэмкIэ и комитетхэм. 
ЗэIущIэм арэзы щытехъуащ «Къэбэрдей-Балъкъэр Республикэр нэгъуэщI щIыналъэм щыпылъ и гъунапкъэм зихъуэжа нэужь, муниципальнэ районхэм я гъунапкъэхэм зэхъуэ­кIыныгъэ зэрыхалъхьэ щIыкIэм теухуауэ» ­КъБР-м и Законым къару имыIэжу къэлъы­тэнымрэ республикэ закон щхьэхуэхэм зэ­хъуэкIыныгъэ хэлъхьэнымрэ я IуэхукIэ» ­КъБР-м и законым и проектым. Ар ягъэхьэзыращ «ЩIыпIэ унафэр IэнатIэхэр къызэрызэрагъэпэщ щIыкIэм ехьэлIауэ» ФЗ №33-р 2025 гъэм гъатхэпэм и 20-м къызэращтам тету. Дэфтэрым щагъэбелджылащ депутатхэмрэ щIыпIэ унафэр зезыхьэхэмрэ я къалэнхэр, хаб­зэубзыху IуэхущIапIэхэм я лэжьыгъэр зэ­рау­хуэр, цIыхухэм я Iуэху еплъыкIэхэр къы­зэращIэ щIэупщIэныгъэхэр муниципальнэ щIыналъэхэм зэрыщрагъэкIуэкIыр, нэгъуэщIхэри. 
Депутатхэм къащтащ «КъБР-м и туризмэм и IуэхукIэ» КъБР-м и Законым зэхъуэкIыныгъэхэр хэлъхьэным теухуауэ» законопроектыр. КъызэрыхагъэщамкIэ, туризмэм ехьэлIа Iуэхухэм щагъэгъуэзэнущ КъБР-м зыуэ щыт и интернет-порталымккIэ. 
КъБР-м щIалэгъуалэм я IуэхухэмкIэ и ми­нистр Лу Азэмэт тепсэлъыхьащ «КъБР-м и щIалэгъуалэ политикэм теухуауэ» законым халъ­хьэ зэхъуэкIыныгъэхэм. Абы зэрыжиIамкIэ, дэфтэрым дыщIагъуахэм ящыщщ щIалэ­гъуалэр хэкупсэу къэгъэхъуным хуэгъэзауэ щIыналъэм къыщыгъэсэбэпыпхъэ Iэмалхэр.
ЗэхъуэкIыныгъэхэр халъхьащ «Балигъ ныбжьым нэмысахэм я Iуэхухэмрэ абыхэм я хуитыныгъэхэр хъумэнымкIэ комиссэхэмрэ ­абыхэм я лэжьыгъэр къызэгъэпэщынымкIэ щIы­пIэ унафэр зезыхьэ IуэхущIапIэхэм къэрал пщэрылъхэр ящыщIынымрэ теухуауэ» ­КъБР-м и Законым и Iыхьэ 16-м, «Щэнхабзэм и IуэхукIэ» КъБР-м и Законым и Iыхьэ 36-м. Япэ еджэгъуэу хэплъащ «Къэбэрдей-Балъкъэр Республикэм административнэ хабзэхэр къыщызэпемыгъэудынымкIэ и Кодексым». Налшык къалэ округым щIыпIэ унафэр зехьэнымкIэ и Советым къыхилъхьа а законопроектыр зыхуэгъэзар цIыхухэр къызэрырашэкI щIыкIэр егъэфIэкIуэнырщ, транспорт Iуэхутхьэбзэхэр къызэзыгъэпэщ IэнатIэхэр ­хабзэхэм ебакъуэмэ, ахэр жэуапым зэрырашалIэр гъэбелджылынырщ. 
ЗэIущIэм щытепсэлъыхьащ КъБР-м и Парламентым и бжьыхьэ лэжьэгъуэм къаIэтыну Iуэхугъуэ нэхъыщхьэхэм. ЗэхъуэкIыныгъэ ­халъхьащ хабзэубзыху IуэхущIапIэм и регламентым. КъБР-м и Парламентым и гъатхэ лэжьэгъуэр бадзэуэгъуэм и 4-м еух, бжьыхьэ лэжьэгъуэм щIидзэжынущ фокIадэм и 2-м.
БАГЪЭТЫР  Луизэ.