Къэбэрдей-Балъкъэрым и Iэтащхьэр лэжьыгъэ IуэхукIэ хуэзащ республикэм курортхэмрэ туризмэмкIэ и министр Быф Аскэр.
ЗэIущIахэр тепсэлъыхьащ къудамэр зэлэжь унэтIыныгъэхэм, къыхалъхьа инвестицэхэр гъэзэщIа зэрыхъу щIыкIэм, Налшык дэт зыгъэпсэхупIэхэм псы хущхъуэ къезышалIэ бжьамийхэр зэхъуэкIын, узыншагъэр езыгъэфIакIуэ зекIуэхэр къызэгъэпэщын зэрыхуейм, туризмэм егъэщIылIа инфраструктурэм республикэм 2035 гъэ пщIондэ щигъуэтыпхъэ зыужьыныгъэм.
Iэтащхьэмрэ министрымрэ нэхъ убгъуауэ тепсэлъыхьащ туризмэм щылажьэ псоми я щIэныгъэм хагъэхъуэн зэрыхуейм, иджырей гъэхьэщIэкIэ Iэмалхэм зрагъэузэщIын папщIэ, къэралым IэщIагъэлI нэхъыфIу исхэр къызэрешэлIапхъэм.
Иужьрей илъэситхум республикэм хъарзынэу туризмэм зыщиужьащ. Бжыгъэрыбжэхэм къызэратымкIэ, дызэрыт илъэсым и щIышылэ мазэм щегъэжьауэ накъыгъэ пщIондэ Къэбэрдей-Балъкъэрым турист мин 700-м зыщагъэпсэхуащ. Илъэс блэкIам елъытауэ, ар процент 14-кIэ нэхъыбэщ. Туризмэм къызэщIиубыдэ щIыпIэхэми заубгъуащ. Республикэр йолэжь «Туризмэмрэ гъэхьэщIэнымрэ» проектым хиубыдэу, инвестицэ зыхалъхьэ IуэхущIэхэм зезыгъэубгъу программэм ипкъ иткIэ яухуэ, зи щIыпIэр пхъуэж хъу модуль ухуэныгъэхэм. УФ-м экономикэ зыужьыныгъэмкIэ и министерствэм къабыл ищIащ апхуэдэ проект 35-рэ. Къэрал бюджетым къыхэкIыу, а Iуэхум 2025 - 2027 гъэхэм къриубыдэу къыхуаутIыпщынущ сом мелуан 740-м нэс. Лэжьыгъэм къриубыдэу номер 500 яутIыпщыфыну щогугъ.
Гулъытэ щхьэхуэ хуащIащ туризм къудамэр хабзэм къемызэгъ Iуэху щыземыкIуэу къызэрызэгъэпэщыпхъэм. Министерствэр мы илъэсым щегъэжьауэ туристхэр зыщIагъэтIысхьэ унэхэми, абыхэм зезыгъэплъыхь инструкторхэми я лэжьыгъэм кIэлъыплъыну хуитщ. Ар къызыхэкIыр туристхэм я шынагъуэншагъэр нэхъыфIу зэгъэпэща хъун папщIэщ.
Къэбэрдей-Балъкъэрыр щIэуэ зэувэлIэну унэтIыныгъэхэм ящыщщ блог-турхэр къызэгъэпэщыныр, къэралым щекIуэкI гъэлъэгъуэныгъэ-форумхэм хэтыныр, езы республикэм цIыхушхуэ зэкIуалIэ зэIущIэхэр щегъэкIуэкIыныр.
