Бу кюнледе Москвада Халкъ мюлкню жетишимлерини кёрмючю бардырылыучу жерде (ВДНХ)  РФ-ни Правительствосуну бла  Экономиканы айнытыу министерствосуну болушлукълары бла Росконгресс фонд къурап, туризм жаны бла «Путешествуй» деген бешинчи халкъла аралы форум болгъанды. Анга Россейни регионларындан сора да, тыш къыралланы келечилери да къатышхандыла.  Анда хар регионну да миллет арбазлары къуралгъандыла. Бу жол къараучуланы саны 500 мингден атлагъанды, аланы иги кесеги  Шимал Кавказгъа, ол санда Къабарты-Малкъаргъа эс бургъандыла. 

- Арт заманда «Эльбрус» тау- лыжа курортда солугъан тыш къыраллы туристлени саны эки кереге кёбейгенди. Ол а пандемиягъа дери кёрюмдюге келишеди. Аланы иги кесеги  Европаны келечилеридиле. Болсада немислиле бла италиячыла бирсиледен кёбюрекдиле. Туризмни айнытыр муратда байламлыкъланы кючлегенибизни уллу жетишимге санарчады. Аны бла бирге  ол шарт Россейде, андан тышында да курортну даражасы ёсе баргъанын  ачыкълайды,- дегенди Кавказ.РФ биригиуню таматасы Хасан Тимижев, халкъла аралы туризм форумда сёлеше. 

Ол айтханнга кёре, тау-лыжа курортну жаланда къыралны бла бизнесни бирге ишлеулерини хайырындан айнытыр онг барды.  Къурулуш ишле уа   РФ-ни Экономиканы айнытыу министерствосуну себеплиги бла бардырыладыла. Аны чеклеринде инвестицияла адамланы иш бла жалчытыу эм башха магъаналы борчла толтуруладыла. Бюгюнлюкде «Эльбрус», «Архыз», «Мамисон» эм «Ведучи» курортланы биригиуню магъаналы проектлеринден бирлерине санаргъа боллукъду. 

Магометланы Сулейман хазырлагъанды.