Тюнене Нальчикде Россейни 23 регионундан 500-ден аслам жаш спортчу жыйылгъандыла. КъМР-ни ара шахарында художестволу гимнастикадан «Тауланы жомакълары» битеуроссей эришиуле башланнгандыла. Ала «Локомотив» физкультура-спорт биригиуню саугъалары ючюн бардырыладыла.

Спортчуланы, тренерлени эм къараучуланы КъМР-ни Парламентини башчысы Татьяна Егорова алгъышлагъанды. Ол художестволу гимнастика спортну ариу, сейир эм жамауат бек сюйген тюрлюсю болгъанын, анга къызчыкъланы бла жашчыкъланы арасында сейир ёсгенин айтханды. 
- Гимнастика къыралны белгисиди дерчады. Хар жылдан да бу эришиулеге келгенлени саны ёседи, регионла кенгередиле. Эришиуле фахмунгу, халинги, низамлыгъынгы кёргюзтюрге онг бередиле,   бу сынаулада  жетишимли боллугъугъузгъа ишексизме.  Бюгюн сахнагъа чыгъарыкъ къызчыкъла уа залда олтургъанланы спорт бла кюреширге кёллендирирле деп бек ышанама.  Къыралда уа ол жаны бла битеу мадарла къураладыла,-дегенди спикер эмда эришгенлеге хорламла тежегенди. 
Жыйылгъанланы Сабийлени бла жаш тёлюню чыгъармачылыкъларыны республикалы къаласыны башчысы Оксана Карашева, КъМР-ни Художестволу гимнастикадан федерациясыны таматасы Ирина Тавитова, эришиулени тамата судьясы Наталья Короткова эм башхала алгъышлагъандыла. Ала Нальчикде къыралны регионларындан, аланы араларында уа жангы субъектлеринден да жаш спортчула келгенлерине ыразылыкъларын билдиргендиле эмда алагъа хорламла, жангы жетишимле тежегендиле. 
Эришиулени кезиуюнде къууанчлы иш да болгъанды. Къабарты-Малкъардан эм Краснодар крайдан гимнастла «Россейни художестволу гимнастикадан спортуну устасына кандидат» деген атлагъа тийишли болгъанлары ачыкъ этилип, алагъа майдаллары бла удостоверенияла берилгендиле. 
Ал кезиуде бу эришиуле республика даражада ачыкъ турнирча башланнган эдиле, къысха заманны ичинде ала битеуроссей даражагъа дери ёсгендиле. Тюрлю-тюрлю жыл санлада къызчыкъла сынауларын, фахмуларын кёргюзтедиле. 

Тикаланы Фатима.