«Спортыр наркотикхэм я бийщ» къыхуеджэныгъэм щIэту КъБР-м и Кубокыр шахмат «псынщIэмкIэ» къэхьыным хуэунэтIа зэхьэзэхуэ Налшык къалэм и «Каисса» уардэунэм щекIуэкIащ. Абы хэтащ ди республикэмрэ Осетие Ищхъэрэ – Аланиемрэ я спортсмен 55-рэ. 
Япэ увыпIэр иубыдащ налшыкдэс Елъкъан Давид, къыхуэхьыну щыта очкои 9-м щыщу 8 иIэу. Очко ныкъуэкIэ абы къыкIэрыхуащ Зеикъуэ къуажэм щыщ Щомахуэ Резуан. Ещанэ увыпIэр къихьащ Нартокъуэ Вячеслав (Налшык къалэ).
Прохладнэдэс, зи ныбжьыр илъэс 7I-рэ хъу Вулах Валерэ иригъэкIуэкIа зэIущIэхэм зэи къыщыхамыгъащIауэ зэпеуэм еплIанэ щыхъуащ, очкоиплI иIэу. Апхуэдэуи къыхэжаныкIахэм яхэтщ Джэдгъэф Чэмалрэ (Зеикъуэ) Темыркъан Давидрэ (Налшык).
Шахматистхэм я зэхьэзэхуэм саугъэт щхьэхуэхэри щагъэуват. Ветеранхэм я саугъэтыр Щэуей Iэниуар иратащ, ныбжьыщIэхэм яйр – Токъуий Валерэ, щIалэ цIыкIухэм – Тедеев Максим (Владикавказ), хъыджэбз цIыкIухэм – Ахматовэ Iэминэ (Налшык). 
АЛЫДЖЫКЪУЭ Руслан.