Краснодар крайны Небуг элинде футболдан битеуроссей сабий-жаш тёлю эришиу бардырылгъанды. Анга къыралыбызны жер-жерлеринден 2012 жылда туугъан спортчуладан къуралгъан эм умутландыргъан къауумлары къатышхандыла, ол санда бизни республикадан А.Апшевни атын жюрютген школну келечилери да.

Футболчула жаш болгъанлыкъгъа, оюнла сейир ётгендиле, ала усталыкълары, хорламгъа итиниулюклери бла да абаданладан артха хазна къалмагъандыла. Бизни спортчуларыбыз быллай уллу эришиулюкде талай матчны хорлам бла бошагъандыла.

Быллай даражалы турнирде ала биринчи кере болгъан эселе да, доммакъ майдал бла къайтхандыла. Къауумну тренер Гергъокъланы Т.В. хазырлагъанды.

Хабибуллахланы Зульфия.