Къабарты-Малкъарда Россейни кюнюне аталгъан ишле алгъаракъладан окъуна башланнгандыла. 5 июньда уа Нальчикде Жаш къараучуну театрында «Биз хорламыбызны ёз къыйыныбыз бла  болдургъанбыз» деген регион  проектге къатышханла «Орус вальс» флешмобха къошулгъандыла.

Бу ишни тарых кертиликни сакълар эмда жаш тёлюню патриот ниетде юйретир муратда «Россейни халкъларыны ассамблеясыны регион бёлюмю Халкъла аралы черкес ассоциация эмда Маданият фонд «Биз Хорламны кеси къыйыныбыз бла болдургъанбыз» деген проектни чеклеринде къурагъандыла. Анга КъМР-ни Парламентини Маданият, граждан обществону айнытыу, информация политика жаны бла комитетини председатели, республиканы халкъ артисти Текуланы Амур, КъМР-ни миллетлени ишлери, жамауат проектле жаны бла министри Анзор Курашинов,  Халкъла аралы черкес ассоциацияны президенти Хаути Сохроков, жамауат эмда маданият миллет араланы башчылары да къатышхандыла.

Студентле, школчула да кёп санда келгендиле, шахарчыла да аслам эдиле. Сабийле вальс тепсегендиле, къобуз тартыулагъа аякъ бюкгендиле. Къууанчлы жыйылыуну кезиуюнде уа Александр Пушкинни, башха совет эмда бу жерли авторланы назмулары эшитилгендиле. Ала деменгили къыралыбызгъа, аны кёп миллетли халкъына жоралана эдиле.

Жыйылгъанланы биринчи болуп Хаути Сохроков алгъышлагъанды. «Россейни кюню»  къыралыбызны деменгилилигини белгисиди. Биз а уллу къыралны бир кесегибиз. Бюгюн озгъан заманлагъа хурмет этебиз, аны бла бирге шёндюгю жаш тёлюбюз бла да ёхтемленебиз. Жерлешлерибиз энчи аскер операцияда Ата журтубузну жалынчакъсызлыгъы ючюн къазауат этедиле. Ала республиканы, къыралны, аны къой, битеу дунияны да, фашизмден къоруулайдыла»,- дегенди.

Россейни деменгилилигин, аны ёхтемленир заты кёп болгъанын белгилей, Хаути Хазритович анга бу байрам да шагъат болгъанын чертгенди. «Кёп миллетлени келечилери жыйылгъандыла бери. Алада кийимле кёп тюрлюдюле, жырла башха-башха тилледе айтыладыла, тепсеулери да айырмалыдыла, алай аланы бир зат бирикдиреди – деменгили Россейге сюймеклик. Къарачыгъыз, аланы кёзлеринде къыралыбыз ючюн къаллай бир ёхтемлик болгъанын»,- деп къошханды ол.

Анзор Курашинов а быллай магъаналы ишни къурагъанлагъа ыспас этгенди эмда ол тёреге айланырыгъына ышаннганын билдиргенди.

Текуланы Амур а жыйылгъанланы «Анам - Россей» деген жыр бла алгъышлагъанды. Жаш тёлюге да насийхат сёзле айтханды: «Алгъа таукел барыгъыз. Барыбыз да бир ниетли болсакъ, бириксек, бизни хорларыкъ чыгъарыкъ тюйюлдю. Россей бизни ёхтемлигибизди, кючюбюздю»,- дегенди ол.

Сёлешгенле дагъыда болгъандыла. Аланы араларында  «Вече» орус маданият араны башчысы Роман Литвинов, Нартан элден акъсакъал Мухамед Тохов да бар эдиле.

Сахнада уллу экранда уа Россейни кюмюш, алтын халыла, минчакъла, лентала, къумачла, тери бла ишленнген картасы кёрюнеди.  Аны битеу Россейни халкъларыны  къолдан усталары ишлегендиле. Ёлчеми 3,3 х 6,7 метрди, ауурлугъу уа элли килограммгъа жетеди. Аны юсюнде Россейни халкъларыны белгилери бла 82 эшилген сурат барды. Картаны жарашдырыугъа къыралны кёп регионларындан 260 уста къатышханды. Ала ишлеринде эллиден артыкъ материалны хайырланнгандыла.

Ахырында Маданият фондну таматасы Люаза Макоева жыйылгъанланы «Орус вальсха» къатышыргъа чакъыргъанды. 
Концерт программа да аламат болгъанды. Шёндюгю тепсеулени «Арабеск» ансамбли, КъМР-ни сыйлы артисти Тимур Гуазов, Нартан элден жырчы къауум, «Кавказны танглары» юлгюлю сабий тепсеу ансамбль, «Глория», «Каллисто» той-оюн къауумла тепсеп, жыйылгъанланы кёллерин алгъандыла. Къырал музыка театрны солисткасы Жаболаны Замираны жырлагъанын къараучула бек жаратханларын толкъун къарсла бла кёргюзтгендиле. 

Холаланы Марзият.