Аманлыкъчыланы терсликлерине жолукъдуруу жаны бла федерал службаны КъМР-де Управлениясыны 3-чю номерли колониясында тюзетиу арача ишлеген энчи жер къуралгъанды. Анда жууапха эркинликлери сыйырылмай тартылгъан эр кишилеге 53 жер барды. Бу жумушла жууапха тартылгъанланы ишлерге кёллендирир, аланы жангы усталыкъгъа юйретир, жамауат жашаугъа сингдирир эмда праволу низамлыкъны жаяр мурат бла толтуруладыла, деп ангылатхандыла бизге УФСИН-ни пресс-службасындан.

Араны ачылыууна КъМР-ни Правительствосуну башчысыны орунбасары Марат Хубиев, РФ-ни Юстиция министерствосуну регионда Управлениясыны таматасы Къужонланы Жантемир, прокурорну орунбасары Денис Жуков, урунууну  бла социал къоруулауну министр Тогъузаланы Тахир, жамауат-къараучу комиссияны таматасы Анатолий Барсагов, КъМР-де Адамны эркинликлери жаны бла уполномоченныйни аппаратыны башчысы Анзор Тлепшев, жамауат, дин организацияланы келечилери, предпринимательле эм башхала къатышхандыла.

Ара «Кровля сервис» обществода къуралгъанды. Жууапха тартылгъанла мында юйлени башларын жамаргъа, къабыргъалагъа, буруулагъа керекли затла  чыгъарыу бла кюреширикдиле. Алай бла ала иш хакъ алып, аманлыкълары ючюн тюшюрген къоранчланы къайтараллыкъдыла.

Тюзетиу арала «РФ-де пробацияны юсюнден» федерал законну чеклеринде къуралгъанларын, ала уголовно-толтуруучу системаны айнытыуну концепциясыны магъаналы кесеги болгъанын белгилерчады. Нальчикде ачылгъан тюзетиу ара бешинчи болгъанды,  къалгъанлары Прохладна эм Чегем районлада ишлейдиле.