Светлогорскда Владимир Путинни башчылыгъы бла Къырал Советни президиумуну жыйылыуу болгъанды. Анда сёз Россей Федерацияны субъектлерини саулукъ сакълау жаны бла борчларыны юсюнден баргъанды. Жыйылыугъа Къабарты-Малкъарны Башчысы Казбек Коков да къатышханды.
Саулукъ сакълауда арт жыллада кёп зат этилгенин эсгертип, Россейни Президенти анга адамларыбызны жашау ёмюрлерине къошулгъаны шагъатлыкъ этгенин чертгенди.Саулукъ сакълауну битеудуния организациясыны шартларына кёре, 2014 жылда узакъ ёмюрлюлюкню орта ёлчеми 70,9 жыл болгъан эсе, 2019 жылда 73,6-гъа жетгенди.
-Ол а кёп регионлада бет жарыкълы уруннган врачланы, медицина организацияланы, алимлени, фахмулу специалистлени хайырындан болгъанды. Ала бийик технологиялы эмда энчи медицина болушлукъну айнытыугъа, аналаны бла сабийлени саулукъларын сакълаугъа уллу къыйын салгъандыла. Мен энтта да бир кере чертип айтыргъа сюеме: бизни жетишимлерибиз андан да кёп этерге къолубуздан келгенин, биз жамауатыбызны дайым ёсюп баргъан бийик излемлерин эсге алып, ишибизни бютюн кючлендирирге керек болгъаныбызны кёргюзтедиле»,-деп белгилегенди къырал башчы.
Аны бла бирге, деп къошханды Владимир Путин, инсанларыбызны 60 процентинден асламы медицина жумушланы качестволарына ыразы тюйюлдюле. Артыкъда биринчи болушлукъ бериуге, ол санда фельдшер-амбулатор пуктланы, врач амбулаторияланы, поликлиникаланы, район больницаланы ишлерине дау кёп этиледи. Аланы асламысыны мекямлары озгъан ёмюрню ортасында окъуна ишленнгендиле, кёп жылланы жангыртылмагъандыла, диагностика оборудование осаллай къалады, врачла жетишмейдиле.
-Биз шёндюгю халгъа тюненеги осал кезиулеге къарап багъа бичерге керек тюйюлбюз, бусагъатдагъы заманны излемлерин, тамбла уа къалай болса сюйгенибизни эсге алыргъа тийишлиди. Тюнене уллу жетишимге саналгъан зат бюгюнлюкде марда болуп къалгъанды. Ол тюздю. Аны себепли биз белгилеген жолубузда алгъа атламларыбызны терклендирирге керекбиз,-дегенди Президент.
Россейни Правительствосуну буйрукъларына кёре, деп къошханды Владимир Путин, бусагъатда биринчи медицина болушлукъ берген бёлюмню ишин тюрлендириуню жорукълары къабыл кёрюлгендиле. Алагъа кёре Федерацияны субъектлери 10-чу январьгъа кеслерини регион программаларын жарашдырыргъа эмда 1июльгъа дери къабыл кёрюрге керекдиле.
-Биринчи звено ючюн бек алгъа регион властьла жууаплыдыла, аны себепли битеу жыйылгъан проблемаланы кетериу амалланы юслеринден да энчи оюмугъуз болургъа керекди. Биринчи звено, адамлагъа башхаладан жууукъду эмда бек магъаналыды. Адамларыбызны тарыгъыуларыны асламысы тюздюле, ол себепден иги жанына аз да тюрлениу болгъанлай, ол эсленмей къалмайды. Жер-жерли властьла уа, оптимизацияны сылтауу бла медицина болушлукъ алыргъа бютюн къыйын болурча эте эселе, ол иги тюйюлдю,- дегенди къыралны оноучусу.
Президент бир поликлиниканы да юлгюге келтиргенди. Анда терапевтле жууукъ тийреледе жашагъанлагъа къарайдыла, башха специалистле, диагностика оборудование уа шахарны башха къыйырындадыла неда къоншу районда окъунадыла: «Аллай амал ырысхыны аяйды, алай адамланы сейирлерин бла сурамларын сансыз этеди, медицина жумушла бла жалчытыугъа тыйгъычла салады. Кертиди, аллай болумда да бирле тёзерле, башхала уа къолларын булгъап кетерле да, артда уа ауруулары къыйыннга айланыр да къалыр».
Владимир Путин, жууукъ заманнга баш борчланы белгилей, медицинада ишлегенлеге тап онгла къураргъа, аланы иш хакъларыны шёндюгю системасын тюрлендирирге кереклисин айырып айтханды. «Биринчи звенода ишлеген врачланы сынауларындан, билимлеринден, усталыкъларындан, аланы жюрек халаллыкъларындан да кёп зат къалады. Ала хар адамны саулугъу ючюн, алай эсе уа, битеу халкъыбызны халы ючюн жууаплыдыла.
Биринчи звенону ишин жангыча къураугъа 2020 жылдан башлап юч жылны ичинде къошакъ халда 150 миллиард сом берирге белгиленеди. Айтып къояйым, ол ахча ал кезиуге жетер деп тергеледи. Регион программала тинтилгенлеринден сора аны ёлчеми тюрлендирилирге боллукъду. Правительство регионлагъа ахча юлешиуню кеси амалларын билдиргенди. Оноу этген тынч тюйюлдю, ол бюджетле аралы трансфертле бла байламлыды. Мында бек башы – бёлюннген ахчадан хайыр чыгъарча этиудю.
Бусагъатда тап амал табыуну магъанасы уллуду. Биринчи звено – саулукъ сакълауну битеу системасыны мурдоруду, аны аты окъуна айтып турады ол баш магъаналы жумуш болургъа кереклисин. Бу бёлюмню бийик даражагъа кётюрюр ючюн власть органланы барысы да келишиулюкде ишлерге керекдиле,-дегенди Владимир Путин.
