«Каббалкэнерго» компанияны Черек районда бёлюмюню окъутуу-юйретиу тийресинде эришиуле ётгендиле. Анга къатышхан энергетикле, ол санда сетьлени жумушларына къарау эмда техникагъа бла оборудованиягъа ремонт этиу бла кюрешген онюч специалист ишчи хунерликлерин кёргюзтгендиле.

Аланы этгенлерине судьялыкъ комиссияны къаууму багъа бергенди. Ала энергетикле къалай хазырланнганларына, къауумла бирлешип къармашханларына, конкурсну кезиулерин нечик терк ётгенлерине, жорукъланы билгенлерине да къарагъандыла.

Эришиу беш кезиуден къуралгъанды. Ахырында Май районну электрокюч сетьлерини келечилерин биринчи жерге дурус кёргендиле. Экинчиле бла ючюнчюле уа Прохладна эмда Урван РЭС-лени къауумлары болгъандыла.

Судьялыкъ этген къауум беш номинацияда айырмалыланы да белгилегенди. Аны бла эм иги устагъа Черек РЭС-ни келечисин - Уяналаны Кязимни санагъандыла, ишин тынгылы билген электромонтёргъа уа Терк районну электрокюч сетьлеринде уруннган Аскер Дадовну сайлагъандыла. Эм сынамлы (59 ж.) электромонтёр Басхан РЭС-ни келечиси Арсен Виндижев, эм жашха (21 ж.) уа Май райондан Данил Шевченко болгъандыла. Урван РЭС-ни тамата устасын - Келеметланы Заурбекни къараучуланы атындан саугъалагъандыла. Судьялыкъ этгенлени санында уа «Каббалкэнергону» подстанцияларыны службасыны башчысын - Азамат Жемгуразовну белгилегендиле. Аланы барына дипломла бла саугъала бергендиле.

«Сиз бюгюн керти да уста, билимли, тири болгъаныгъызны кёргюзтгенсиз. Электроэнергетикада адамдан ма ол ышанла изленедиле, ток бла жалчытыу, къоркъуусузлукъ да ма алагъа кёре боладыла», - дегенди компанияны башчысыны биринчи орунбасары – тамата инженер Алибек Яганов.

Улбашланы Мурат.