Быйыл Россейде «Жашау этерге инфраструктура» миллет проектге кёре, мектеплеге, сабий садлагъа, вузлагъа, чыгъармачылыкъ эм спорт  аралагъа баргъан   юч минг километр чакълы бирде жоллагъа тынгылы ремонт этилликди. Проектни магъанасы сабийлеге, ата-аналагъа эм педагоглагъа иги эм къоркъуусуз инфраструктура къураргъады. Планнга кёре,  сагъынылгъан объектлени кёбюсю  жангы окъуу жылгъа хазыр болургъа керекдиле.

- Билим бериу эм башха социал магъаналы учреждениялагъа баргъан жолла иги эм къоркъуусуз болурча амал - сабийлеге, ата-аналарына эм педагоглагъа тап болурча этиледи.   Сыйдам жолла, "зебрала", жорукъланы билдирген белгиле эм кече жарытхан чыпынлы чыракъла  аварияланы санын азайтадыла.  Андан сора да, мектепге жюрюген улоула тыйгъычсыз  борчларын толтурадыла. Алай бла быйыл миллет проектге кёре, регионал эм жер-жерли автомобиль жолланы 3 минг километр чакълы биринде  854 объектге къараллыкъды,-  деп билдиргенди РФ-ни Правительствосуну Председателини орунбасары   Марат Хуснуллин.

РФ-ни Транспорт эмда жол мюлк министри Роман Старовойт айтханыча, объектлеге тынгылы  ремонт  комплекс  халда бардырылады.  Жангыдан асфальт салгъанларындан сора да, къоркъуусузлукъ жалчытылынырча аслам эс бурулады. Ол санда жорукъланы билдирген  тийишли белгиле, ызла,  буруула эм башха затла да жарашдырыладыла.  Былтыр "Къоркъуусуз эм тынгылы автомобиль жолла" миллет проектни  чеклеринде къыралда 3,1 минг километрде 920 объект жангы излемлеге келиширча болгъандыла.

- Алты жылны ичинде "Къоркъуусуз эм тынгылы автомобиль жолла" миллет проектни чеклеринде мектеплеге, сабий садлагъа эм вузлагъа баргъан жолланы 5 минг километри жангыртылгъанды. Бюгюнлюкде бу жаны бла ишле "Жашау этерге инфраструктура" миллет проектге кёре бардырыладыла. Мардалагъа келишген жолла,  жангы ишленнген учрежденияладан сора да,   тынгылы ремонт этилгенлеге да тартыладыла,- деп къошханды Федерал жол агентствону таматасыны орунбасары  Игорь Костюченко.

Къабарты-Малкъарны юсюнден айтханда, быйыл тийишли ишле 80   километр чакълы бирде - 44 объектде тамамланырыкъдыла. Аны кезиуюнде 15 элде жоллагъа къараллыкъды. Андан сора да, къошакъ халда 5,5 километрде 3 объект бюгюннгю излемлеге келиширча боллукъдула.

Жангыртылгъан жолла саулукъ сакълау, билим бериу,  маданият, спорт учреждениялагъа баргъанладыла. Аны тышында, муниципалитетлени арасында жол инфраструктура да  игилендириледи.

Саулай алып айтханда, алты жылны ичинде сагъынылгъан миллет проектни чеклеринде  1118 километрге къаралгъанды эм 380 километрде кече жарытырча мадар этилгенди. Алай бла бюгюнлюкде регионал жолланы 74,8 проценти мардалагъа келишгенлерин да белгилеп айтырчады. Мындан арысында да эки жылны ичинде   100 километр чакълы регион магъаналы жол жангыртылынырча мадар этилликди.  

Курданланы Сулейман.