Орус география биригиуню (РГО) къыралда бир ненча бёлюмюню башчылары алгъаракълада Нальчикде жыйылгъандыла. Ала эмда университетлени, музейлени, институтланы таматалары да къатышып, Правительствону юйюнде бу биригиуню стратегиялы сессиясы ётгенди. Анга илму жамауатха уа РГО-ну вице-президенти Артём Манукян таматалыкъ этгенди.

Къонакъланы араларында белгили жолоучу, шимал тийрелени тинтиучю, РГО-ну Рязаньда бёлюмюню башчысы, Россейни Жигити Михаил Малахов да бар эди. Бу алим адамны Арктикада эмда Антарктикада сууукълукъгъа, ол санда акъылына, хата салгъан болумлагъа чыдамлыгъын тинтиу бла отуз жылдан артыкъ заманны кюрешгенди.

Жыйылыуну ачылыууна КъМР-ни Правительствосуну Председателини биринчи орунбасары Муаед Кунижев, орунбасары Марат Хубиев, жарыкъландырыу эмда илму министр Анзор Езаов, табийгъат байлыкъла эмда экология министр Шауаланы Илияс да къатышхан эдиле.

Муаед Ахъедович къонакълагъа КъМР-ни Башчысы Казбек Коковну алгъышлау сёзюн туура этгенди. «Стратегиялы сессияны Къабарты-Малкъарда бардырылгъаны республиканы даражасы бийик болгъанын, Россейни регионлары географиягъа сейирни къозгъаугъа бирлешип кюч салгъанларын кёргюзтеди», - деп айтылады анда.

Сессияда Орус география биригиуню он жылны ичинде ишини эсеплерин чыгъаргъандыла, мындан арысында этиллик жумушларын да туура этгендиле. Регионланы араларында ахшы сынам бла шагъырейлениуге артыкъда уллу эс бурулгъанды.

Докладлары бла Артём Манукян, РГО-ну башчысыны экинчиси Сергей Корлыханов, биригиуню Къабарты-Малкъарда бёлюмюню таматасы Аксана Карашева сёлешгендиле.

Жыйылыуда айтылгъаныча, сессия РГО-ну 180-жыллыгъында бардырылады. Бюгюнлюкде бу биригиуню иши къуру географиядан илму бла угъай, жаш тёлюню патриот ниетде юйретиу, туризмни айнытыу бла да байламлыды. Ол умутда Россейде эмда тыш къыраллада географиядан  жазыу ишле, кёрмючле, фестивальла, дагъыда жарыкъландырыу, жолоучулукъ, грант, табийгъатны къоруулау жумушла тамамланадыла.

РГО-ну архивинде жарым миллион чакълы илму эмда 42 мингден артыкъ картография материалла сакъланадыла. Ахыр жыллада уа жаш тёлю къымылдауну проектлерине игирек эс бурулады.

Бу жаны бла Къабарты-Малкъар ахшы къошумчулукъ этгенин белгилегендиле жыйылыуда. Мындагъы бёлюм арт жыллада башхаладан эсе терк айныгъанды. Сёз ючюн, былтыр ол къыркъдан артыкъ жумуш тамамлагъанды, алагъа жети минг адам къатышханды, ол санда беш минги география диктант жазгъандыла. Чегем тарда «Акъ-Топуракъ ауушну тамашалыгъы» проект а бу диктантны чеклеринде бардырылгъан битеуроссей конкурсда «Эм аламат видеоролик» номинацияда хорлагъанды.

Мокъаланы Тенгизни башчылыгъында РГО-ну жаш тёлю арасы ачылгъанын да белгилерге тийишлиди. Аны санында юч клуб барды. Танг аласында Бызынгы хунаны аллында бардырылгъан география дерсге уа педагогла, алимле, Правительствону келечилери да къатышхан эдиле.

«Биз хар бирибиз да - маданияты, табийгъаты, тарыхы бай болгъан бирер регионну келечисибиз - бирге болуп, жерибизге, Ата журтубузгъа, адамларыбызгъа сюймекликге таяннган болумну къурайбыз. Бу сессияда хайырлы ушакъла бардырыллыкъларына, къыйматлы оноула этилликлерине, жангы проектлеге жол ачыллыгъына ышанама», - дегенди Аксана Карашева.

Омарланы Мурат хазырлагъанды.