Нальчикни ара солуу паркында чекленнген онглары болгъан сабийлеге онекинчи зауукълу эришиуле къуралгъандыла. Алагъа Спорт министерствону адаптив школуна жюрюгенле, республиканы шахарларындан бла эллеринден сабийле къатышхандыла, аланы саны жюзден аслам болгъанды. Жаш спортчулагъа кёл этдирирге уа энчи аскер операцияны ветеранлары да келгендиле.

Чабыу башланырны аллында жыйылгъанла гимнастикадан Россейни спортуну усталары бла жараула бардыргъандыла. Эришиуню аллындан ахырына дери уа 800 метрни сабийлени биргелерине «Биринчилени атламлары»  регион биригиуню волонтёрлары болгъандыла, ала сакъат балаланы аш-азыкъ бла сыйлагъандыла, концерт да кёргюзтгендиле.

Огъурлу жумушха Олимпиаданы грек-рим тутушуудан чемпиону Мурат Кардановну башчылыгъында  КъМР-ни Парламентини депутатлары да къошулгъандыла.

Бу эришиуде хорлатхан болмагъанды, сабийле барысы да сыйлы къагъытла бла саугъаланнгандыла.

Кульчаланы Зульфия.