Бирси кюн Нальчикни аэропортунда кече ортада  Сочиден жангы рейс бла учхан эрттеден сакъланнган хауа кемеге тюбегендиле, деп билдириледи КъМР-ни Транспорт эмда жол мюлк  министерствосуну пресс-службасындан. 

Эсге сала айтсакъ, «Сочи-Нальчик» рейсни   «Азимут» авиакомпанияны  жюз пассажирге жерлери болгъан  «Сухой Суперджет 100» самолёту тамамларыкъды. Ол ыйыкъгъа  бир кере геуюрге кюн, Сочиден  21:25 сагъатда    учарыкъды. Ызына уа  23:35 сагъатда атланырыкъды.  Жолгъа бир сагъат къоратылылкъды.

- Нальчик бла Сочи курорт шахарла болгъанларын эсге алсакъ, быллай башламчылыкъны магъанасы уллуду. Сёз ючюн, быйылны  башындан бери Къабарты-Малкъарда бир миллион чакълы турист болгъанды. Ол,  былтыр бу заман бла тенглешдиргенде  17 процентге кёпдю. Аланы асламысы Элбрусда эм федерал магъаналы Нальчик курортда солуп, саулукъларын да  кючлегендиле,- дегенди «Нальчик» халкъла аралы аэропортну  таматасы Сергей Айнетдинов.

Жангы маршрутну энчилигини юсюнден айтханда, билетле учузуракъ болурча,  Къабарты-Малкъарны Правительствосу субсидия бёлгенди. Ол себепден къыйматлы рейсни кёпле хайырланыргъа онг табарыкъдыла. Билетлени багъасы 1800 сомдан башланады. 

Бир тюрлю соруулары болгъанла «Нальчик» халкъла аралы аэропортну неда «Азимут» авиакомпанияны сайтларында табаргъа боллукъдула.

Магометланы Сулейман.