Бир жол Нальчикде, Къабарты орамда айлана, Шёндюгю заманны искусствосуну галереясын кёреме. Ол къаллай болур деген оюм бла ичине киреме. Къабыргъада, полда энди тапкалада  тюрлю-тюрлю суратла, ала кёпдюле, кесиликлери бла хар бири да сейирликди. Артдаракъ билгенимча, аны «Муратла толадыла» деген жандауурлукъ фондну башчысы, республикада аты кенг белгили тележурналист, жазыучу, жамауат къуллукъчу, саусуз сабийлеге болушлукъ этерден артха турмагъан  Фатима Магомедова ачханды.

Суратлау искусство эм жандауурлукъ  иш  бирге  тынгылы къуралып бардырылгъанларыны юсюнден эшите-эшите турабыз. Шахарыбызны эм эски, жаяу айланнган баш  орамында  шёндюгю заманны искусствосуну галереясын  ачыу бла байламлы мурат да  бошдан жаратылгъан болмаз эди. Аны ючюн болур, республикада ол муратны жашаугъа  Фатима Магомедова таукел  сингдиргенди.

Арбатда галереядагъы ишлени бары да бир бирге ушамайдыла. Аланы араларында философиялы сагъышла этдирген суратланы, авторланы жюрек эм кёз къарамларыны  ачыкълыкъларын да кёрюрге боллукъду. Ары бир кесекчикге кирип, кеталлыкъ а тюйюлсе. Сёзсюз, суратлагъа къарагъан  ким да жюреги жаратхан ишни  кёрюп, кёзюн алалмай, сагъыш этгенле да бардыла. Анда дунияны бек уллу галереялары къурагъан кёрмючледе  атлары айтылгъан алыкъа  асламлагъа артыкъ  белгили болмагъан художниклени  ишлери да бардыла, кёпдюле. 

Художниклени ишлерини географиялары да  кенгди. Ала Россейни  кёп регионларындан башланып, жууукъ тыш къыраллагъа дери жетедиле. Багъалары да кёп тюрлюдю – юч мингден жюз минг сомгъа дери.

Аллай ишлени сатып алгъан  адамгъа энчи усталыкъ угъай, сезим эмда таукеллик, къоркъа билмеулюк  керекдиле. Озгъан заманланы айтхылыкъ  меценатларында аллай  ышанла болмасала эди, ким биледи, дуния Врубелни, Матиссаны, Ван Гогну, Гогенни эмда кёп башхаланы атларын, ишлерин да  не хазна билир эдиле.

Жангы Галереяны къабыргъаларын, ичин бийлеген ишлени барын да  Фатима кеси  сайлайды. Бу суратланы ичинде Sotheby`s эм Christie`s  энди боллукъ аукционланы лотлары бар эсе уа, ким биледи. 

«Суратланы сюйгенле «Муратла толадыла» деген жандауурлукъ фондну  сатыу-алыу кёрмючлерине «Гранд-Кавказ» арт-къонакъ юйде да тюбегендиле, кёргендиле. Суратланы  бир къауумларын а бюгюнлюкде да анда кёрюрге, ыразылыгъы болгъанны уа сатып алыргъа да онгу барды. Бир- бир суратла уа  социал сетьлени юсю бла да сатылгъандыла, сатыладыла. Анга да къарамай, суратланы дайым да  сатыу-алыу кёрмючюн дайым  къурау бек  керек болады. Битеу ол ариулукъгъа жер керекди эмда аны асламладан букъдуруу ол осал, кечилмезлик ишди.

Холаланы Марзият.