КъМР-де ич ишле министри полицияны генерал-майору Вячеслав Крючков акъылбалыкъ болмагъанланы ишлери жаны бла бёлюмню эмда акъылбалыкъ болмагъанла аманлыкъ этгенлери ючюн болжаллы халда тургъан араны къуллукъчуларын бла ветеранларын профессионал байрамлары бла алгъышлагъанды. Быйыл ведомствону бу бёлюмлери къуралгъанлы 90 жыл болгъанды. 

Вячеслав Крючков КъМР-де сабийлени эркинликлери жаны бла уполномоченный Амина Бадракованы ич ишле органлагъа салыннган борчланы толтурургъа себеплик этгени ючюн Сыйлы грамота бла саугъалагъанды. Министр профилактика органланы сабийлени эркинликлерин сакълауда магъаналарын чертгенди эмда омбудсмен бла мындан ары да хайырлы байламлыкъла жюрютюллюклерине ышаннганын айтханды. 

Бёлюмлени къуллукъчуларыны уллу къаууму  салыннган борчланы толтурууда жетишимлери ючюн ведомстволу саугъала бла белгиленнгендиле.   

- Бу бёлюмле  жууаплы эм къыйын ишни толтурадыла – сабийликни сакълайдыла. Сиз хар кюн да борчларыгъызны толтуруу бла чекленмейсиз, ишигизге кёлюгюз бла берилесиз, тёзюмлюкню, сабийни психологиясын ангылауну, тюзлюкню, къайгъырыулукъну юлгюсюн кёргюзтесиз,-дегенди министр эмда бёлюмледе ишлегенлени бла ветеранланы энтта бир кере алгъышлап, саулукъ, насып, къолайлыкъ тежегенди.

Тикаланы Фатима хазырлагъанды.