КъМР-ни Правительствосунда бардырылгъан «тёгерек» столда экстремизмге къажау ишде информацияны онгларын хайырланыуну сорууларына къаралгъанды. Тюбешиуге КъМР-де Терроризмге къажау комиссияны эксперт советини келечилери къатышхандыла. Анга уа къырал власть органланы, дин биригиулени, право низамны сакълаучу органланы къуллукъчулары киргенлерин белгилерчады.
Кенгешни эксперт советни башчысы Залим Кашироков ачханды эм бардыргъанды. Халкъны бирлигини байрамыны аллында «Кёрюп болмаулукъгъа бла душманлыкъгъа - угъай» битеуроссей оператив-профилактика жумушланы чеклеринде КъМР-де бир ненча профилактика акция бардырыллыгъы белгили этилгенди. Аланы башламчысы РФ-ни МВД-сыды, ала «Биз бирбиз», «Кёрюп болмаулукъгъа бла душманлыкъгъа - угъай», «Биз терроризмге къажаубуз» деген чакъырылыула бла бардырыллыкъдыла. Алагъа окъуучуланы, студентлени къатышдырыргъа белгиленеди. Битеу бу иш экстремизм бла байламлы аманлыкъланы тохтатыугъа, жамауатда аны кёрюп болмауну ниетлерин жайыугъа бурулупду. Тюбешиуге къатышханла акцияла радикал ниетлени жайылыуларын тохтатыргъа, ёсюп келген тёлюню патриотланыча ёсдюрюрге себеплик этериклерин чертгендиле.