КъМР-де УФСИН-ни 1-чи номерли тюзетиучю колониясында ишлегенлени юйюрлерине Ачыкъ эшиклени кюню къуралгъанды. Учрежденияда къуллукъ этгенлени жууукъларына жашлары, къызлары къаллай болумлада ишлегенлерин кёрюрге онг чыкъгъанды. Тюбешиу культура-асламлы халда бардырылгъанды.
Ата-анала, башха ахлула да, колонияны таматасыны орунбасары ич службаны подполковниги Рустам Гучаевни башчылыгъында, административ мекямда болгъандыла, офицерле тургъан юйню, къалауурлукъ этилген жерни да кёргендиле. Алагъа учрежденияны башчыларына соруула берирге да онг чыкъгъанды.
Андан сора къуллукъларына энди киришген жаш адамла ант этгендиле, законлукъну, правону къаты сакъларгъа, адамны эркинликлерин къорууларгъа, боюнларына салыннган борчну бет жарыкълы толтурургъа сёз бергендиле. Ант этиу бошалгъандан сора, УИС-ни ветеранларыны советини таматасы Анзор Сасиков жаш адамланы алларында сёлешгенди, жетишимли болурларын тежегенди эмда уголовный-толтуруучу системаны атына кир къондурмай, ала бла ёхтемленирча къуллукъ этерге чакъыргъанды. Ахырында Рустам Гучаев келген къонакълагъа ыразылыгъын билдиргенди. «Сизни жууукъ адамларыгъызгъа былай эс бургъаныгъыз аланы кёллендиреди»,-дегенди. Ата-анала да учрежденияны оноучуларына ыспас этгендиле эмда аланы быллай ахшы ишлеге терк-терк чакъыра турурларын сюйгенлерин да айтхандыла, деп билдиргендиле КъМР-де УФСИН-ни пресс-службасындан.
