Кёп болмай Ставрополь крайда  «МинводыЭкспо» кёрмюч комплексде бардырылгъан  Кавказны экинчи инвестиция форумунда  жууукъ заманда Къабарты-Малкъарда жылгъа къанатлыланы этинден 30 минг тонна эм жумуртхаладан да 36 миллион чакълы чыгъаргъан уллу фабрика ишленириги белгиленнгенди. Тийишли келишим "КъМР-ни айнытыу корпорация" бла  «Басхан  бройлер»  биригиу  этгендиле. Аны къурулушуна 7,5 миллиард сом инвестиция этилликди.

 Предприятияны бёлюмлери,  онбеш бёлюмю,  республиканы бир къауум районларында  къураллыкъдыла. Аланы уллулукълары 3-4 гектаргъа жетерикди. Санитар мардаланы излемлерине  кёре. ала элледен   кенгирекде орналлыкъдыла. Аны бла бирге фабрикада  мингнге жууукъ адам   урунурукъду.

  Планнга кёре биринчи комплекс келир жыл хайырланыргъа берилликди. Ол толу кюч бла  20З0 жылда ишлеп башларыкъды.

Къыйматлы проектни бардырырча, къыралдан болушлукъ да керек боллукъду. Ол санда жер юлюшле алырча эм  инфраструктурагъа къоратылгъан ахчаны бир кесегин жабарча.

 "КъМР-ни айнытыу корпорацияны"  таматасы Чочайланы Ахмат айтханнга кёре,  инвестициялы проектни "бир терезе" амал бла бардырыргъа болушурукъдула.

Эсге сала  айтсакъ, Росконгрессден билдиргенлерича,  форумну чеклеринде  206 миллиард сом багъасына 86 келишим этилгенди.

Курданланы Сулейман.