Велосипедчини битеудуния кюнюне жоралап республиканы Спорт министерствосу Велосипед спортдан федерацияны себеплиги бла ачыкъ машиналада онтёртюнчю битеукъырал чабыуну бардыргъанды. Ол «Спорт – жашауну низамы» федерал проектни чегинде къуралгъанды.

Спортну бу тюрлюсюн сюйгенле, ала уа эллиден аслам эдиле, эрттенликде сагъат тогъузда «Спартак» стадионну аллында жыйылгъандыла. Аланы спортну ветеранларыны Нальчикде биригиулерини башчысы Уяналаны Владимир бла спорт министрни орунбасары Заур Хежев алгъышлагъандыла.

  Спортчулагъа жыл сан неда хазырлылыкъ жаны бла чекле салынмагъандыла, чабыугъа хар сюйген келгенди. Ала Шогенцуков – Канукоев – Ленин – Тарчоков орамла бла баргъандыла, ахырында хар бирине Спорт министерстводан бла федерацияны биригиулеринден майдалла эмда дипломла берилгендиле.

Чабыу жыл сайын адамланы саулукълу жашау бардырыргъа, физкультура бла кюреширге кёллендирир, велоспортну айнытыр мурат бла ётдюрюледи.

Кульчаланы Зульфия.