Бу кюнледе Нальчикде республиканы Маданият фондунда   сейирлик тюбешиу болгъанды.  Аны ишине жаш поэтле  Алан Романов, Дарья Шомахова, Марина Мазуренко эмда  жазыу ишде биринчи атламларын эте  башлагъан школчу жашла бла къызла  кътышхандыла. Аланы араларында Азаматланы Борис, Локияланы Мадина да болгъандыла.  Биринчи ючеулен республиканы атындан  поэзияны тюрлю-тюрлю  форумларына къатыша келедиле. Башда атлары  сагъынылгъан бу жерли авторладан сора да, поэзияны ингирине Дагъыстандан келген  темир таууш атлы «Магъдан сёз» клубдан Индира Зубаирова эмда Север Осетия-Аланиядан  Лаура Хамицева да къатышхандыла. Анзор Жолдашев а назмула айтылгъанда пианинода согъуп, миллет  макъамланы эшитдиргенди.

Тюбешиуню кезиуюнде  анга къатышханла кеслерини назмуларын окъугъандыла, поэзияны, жазыу ишни эм дагъыда кёп башха затланы  юсюнден ушакъ этгендиле.

-Бизни авторланы чыгъармачылыкълары (бусагъатда сизни Маринаны эм Аланны юсюндн айтама)  аллай аламат болгъанын черте, Къабарты-Малкъар  къыралны бек сыйлы поэзия форумларына къатышыргъа, жетишимли болургъа да боллукъдула. Анга да къарамай,  бу жерли  бир-бир жазыучуларыбызны  чыгъармалары жюрекге жете эселе,  аланы  окъугъанланы саны уа, жарсыугъа, бек азды. Аны юсюнден арт заманлада бардырыла тургъан поэзия тюбешиулени  сурат отчётларына  къарап да айтыргъа боллукъду – сёз ючюн, бизни Маданият фондда эмда  Дагъыстанны ара шахарында поэзияны театрында.

 -Махачкъаланы Расул Гамзатовну атын жюрютген баш орамында  «Поэзияны театры» болгъаны бек игиди. Сизни адабиятыгъызны Дагъыстанда жазыучуларыны союзуну   жаш тёлю  «Буйнакскге»  деген атлы  цехи болгъаны да тамамлыкъ этеди. Ол цехге башчылыкъны да бизни биргебизге болгъан, тенг къызыбыз  Индира Зубаирова этеди. Махачкъалада, бек аздан, миллиондан артыкъ адам жашайды. Анда адабият бла кюрешгенлени саны  не заманда да кёп болгъанды. Поэзияны театрында  программасы да байды, анда  тюрлю-тюрлю тюбешиуле, ингирле, сахна оюнла, концертле да бардырыладыла. Биз ючюбюзге – манга, Марина Мазуренкогъа эмда  Север Осетиядан келген Лаура Хамицевагъа  тынгыларгъа келгенле залгъа сыйынмай окъуна къалгъан эдиле анда. Махачкъалада кёп билирге сюйген жаш адамла жашайдыла: тюбешиу болады деселе,  ары  барып, адамлагъа тынгыларгъа керекди. Бизде уа поэзия тюбешиулеге  жыйырма-жыйырма беш адамдан кёп келмейди, жарсыугъа.

Дагъыстанда жазыучулагъа, бютюнда жаш жазыучулагъа,  бек кёп эс бёлюнеди, тийишли себеплик да этиледи. Ишни ол  жанына биз аладан юлгю алыргъа керекбиз деп  къонакълагъа соруула да бергенди:

-Сиз къыралны тюрлю-тюрлю литература форумларына, мастерскойларына  къатыша келесиз. Бу жерли авторланы сизден юлгю алыр онглары бармыды?

-Болмай а, битеу ол ишле  ачыкъдыла, хакъсыздыла, ким да келсин, къатышсын. Аны себепли не заманда да сакълайбыз. Быйыл а Социал-экономика  эмда социал  программаланы фонду  Москваны эмда Санкт-Петербургну  литература журналлары бла бирге  Россейни жаш жазыучуларыны форумун бардырлыкъды. Хар замандача, анга къатышырыкъ авторланы бир кесеги айырыллыкъды. Форумгъа къатышыргъа эркинликни бир кесегине уа  халкъла аралы чыгъармачы мастерскойгъа къатышханлагъа берилликди. Аллай форумлагъа  белгили поэтле, прозаикле, атлары айтылгъан критикле, «кёп бетли» литература журналланы редакторлары келедиле.

-Жаш болмагъан авторланы конкурсха къатышыр онглары уа бармыды? 

- Анга сёз, тыйгъыч  да жокъду.

Маданият фондда тюбешиуге къатышханданы араларында фондну председатели Люаза Макоева да болгъанды. Ол  а Къулийланы Къайсынны бир къауум назмусун кёлден айтханды.

Холаланы Марзият.