«Спортну жигитлери -урушну жигитлери: Хорламны келтиргенлени туудукълары» деген  битеуроссей патриот акцияны чеклеринде  КъМР-ни Физкультура эм спорт министерствосунда Уллу Ата журт урушну кезиуюнде  спортсменлерибиз болдургъан жигитликлени юсюнден  бюгюнлюкде спорт школлагъа жюрюп жарау этген жаш спортсменлеге документли  фильм кёргюзтюлгенди. 

Ол ишге ауур атлетикадан СССР-ни спортуну устасы,  КъМР-ни физкультурасыны эмда спортуну  сыйлы ишчиси, Нальчик шахар округда Спортну ветеранларыны советини председатели Уяналаны Виктор эм СССР-ни боксдан спортну сыйлы устасы, «За боевые заслуги» орденни кавалери, шахар округну спортдан ветеранларыны советини председателини орунбасары  Анатолий Урусмамбетов, КъМР-ни Парламентинде  жамауат советни члени Газаланы Масхут, КъМР-ни спорт министрини орунбасары Заур Хежев да  къатышхандыла.

Фильм бошалгъандан сора  къонакъла сабийлеге алгъыннгы спортсмен жерлешлерибизни юслеринден дагъыда кёп сейирлик хапарла айтхандыла, киногъа къараргъа келген  жашланы бла къызланы  сорууларына жууапла да бергендиле.

Холаланы Марзият .