Къабарты-Малкъар къырал университетде белгили жазыучу,  журналист, тилманч  Гуртуланы Солтанбекни жашы Салихге жораланып конференция ётгенди. 

Кавказны жазыучуларыны клубу къурагъанды. Анга къатышыр ючюн, келгенле бек алгъа  Нальчик шахарны солуу паркында Жазыучуланы аллеясыны къатында жыйылгъандыла. Аланы араларында  поэтле, жазыучула, Гуртуланы Салихни  жууукълары бла ахлулары, таныгъанла, билгенле, биргесине ишлегенле, поэзиясын жаратханла да бар эдиле. 

Алайда  тюбешиуню Кавказ жазыучуланы клубуну таматасы, «Заман» газетни бёлюмюню редактору Османланы Хыйса ачханды. Ол Гурту улуну чыгъармачылыгъы бла школда окъугъанында окъуна шагъырей болгъанын, газетни редакциясына ишге келгенинде уа, кёллендирип тургъанын айтханды. «Ол адамланы сюйген, бютюнда бег а анасын багъалагъан керти инсан болгъанын чертирге тийишли кёреме.  «Адам, къарындашынгы ачытма, аны башхалагъа да басынчакълатма…» – деген сёзлери  не багъаны тутадыла! Аны игиликге,  шуёхлукъгъа, ариулукъну кёре билирге  чакъыргъан назмулары кёпдюле.  Ол халкъын бек сюйгенди, алай башха миллетлени да эниш этмегенди. Аланы даражаларын да  кётюре билгенди. Анга  былайгъа аны эсгерирге келгенлени  араларында кёп миллетлени  келечилери болгъанлары шагъатлыкъ этеди, – дегенди. 

Кавказны  жазыучуларыны клубуну КъМР-де  бёлюмюню секретары Фарида Кудаева уа  бу биригиуню Гуртуланы Салих къурагъанын эсгертгенди. Алай анга кавказ халкъланы келечилеринден сора да, башха миллетлени жазыучулары да киргенлерин чертип айтханды. Дагъыда  «Литературная газета»  Гуртуланы Салихни аты бла конкурс  къурагъанын да билдиргенди. 

Къарачай-Черкесден келген  Лариса Шебзухова уа малкъар халкъгъа уллу хурмет этгенин чертгенди. «Къыйын заманыбызда сёз бла, иш бла да малкъарлыла бизге бек болушхандыла. Мен аланы игиликлерин бир заманда да унутурукъ тюйюлме», – деп, кёз жашларын сюртгенди.

Гуртуланы Салихни юсюнден айта, ол аланы жазыучуларына келир заманнга ышаныулукъларын тас этмезге болушханын, кёллендиргенлей тургъанын айтханды. КъЧР-ге кеси, делегацияны къаууму бла да келиучюсюн, хар заманда да  аны бла тюбешиуле сейир да, хайырлы да болгъанларын чертгенди.

– Тилманчлыкъ ишге ол кёллендиргенди мени. Кесини чыгъармачылыгъы бла халкъларыбызны араларында келишиулюк болуруна, адет-тёрелерибиз, ана  тиллерибиз сакъланырларына къайгъыргъанды, – деп, къонакъ тиширыу бу тюбешиуню къурагъанлагъа жюрек ыразылыгъын билдиргенди.

Чечен Республикадан келген жаш назмучу  Анзор Хаджимуратов а, быллай аламат тюбешиуге биринчи кере къатышханын  айтып, аны чакъыргъанлагъа ыспас этгенди. «Бери  тебирерими аллында, Гурту улуну чыгъармачылыгъыны юсюнден кёбюрек билирге сюйгенме, аны билген  адамла бла сёлешгенме. Аланы айтыуларына кёре, ол, фахмулу болгъаны бла къалмай, чынтты кавказлы эр киши да болгъанды», – деп къошханды. 

Ызы бла Сарбашланы Азнор  Гуртуланы Салихге жоралагъан назмусун  орус эмда малкъар тилледе окъугъанды. 

«Бирлик» жамауат биригиуню таматасы Сумайланы Ахмат а Салихни халал жюрекли адамныча эсгергенди. «Бир затха да, кимге да уллу кёллюлюк этмегенди.  Аз таныгъан адамыны окъуна бушууу болса, эшитгенлей жетер эди.  Бюгюнлюкде аны юсюнден озгъан заманлада айтхан манга бек къыйынды», – дегенди.  

Ахырында Гуртуланы Салихни жашы Расул аны атасын заман табып эсгерирге келгенлеге жюрек ыразылыгъын билдиргенди. 

Поэтни эсгериу жумушла андан ары Къабарты-Малкъар къырал университетде бардырылгъандыла. Анда  Сумайланы Ахмат, поэтле  Табакъсойланы Мухтар, Додуланы Аскер, Чечен Республика Журналистлерини  союзуну сыйлы таматасы  Руслан Юсупов, Лариса Шебзухова, Фарида Кудаева,  устаз Абайланы Сакинат, дагъыда башхала сёлешгендиле. Поэт  тюзлюкге, кертиликге табыннганын чертгендиле.    

Табакъсойланы Мухтар а Къулийланы Къайсынны сёзлерин юлгюге келтиргенди: «Салихни  назмулары бла тюбешиу – жаз башыны жангырыуу бла тюбешиуге, жылыуну келиуюне, тереклени жашиллениулерине, гюллени чагъыуларына, акъ къарлы тауланы башында кёкню кёклюгюне ушайдыла». 

Сумайланы Ахмат а Кавказ жазыучуланы клубха кирген къауум адамгъа  миллетлени араларында  маданият  байламлыкъланы кючлендириуге, айнытыугъа   уллу къыйын салгъаны ючюн «Бирлик» жамауат организацияны атындан бюсюреу къагъытла бергенди.

Конференция «Гурту улуну окъуулары» деп бошдан бардырылмагъанды, анда поэтни кесини, анга жораланнган назмула да тюрлю-тюрлю тилледе эшитилгендиле.

Эсгертиу: Гуртуланы Салих Къабарты-Малкъар, Къарачай-Черкес эмда  Къалмукъ республикаланы халкъ поэти, жыйырма бешден аслам китапны авторду. Эбизели  Шота Руставелини «Къаплан тери кийген батыр»  деген поэмасын малкъар тилге кёчюргени ючюн «Тбилиси шахарны  сыйлы инсаны» деген атха тийишли болгъан эди.          

Асланбекланы Халимат.