Къэбэрдей-Балъкъэр къэрал университетым и Ветеранхэм я советым щратащ «1941 - 1945 гъэхэм екIуэкIа Хэку зауэшхуэр зэриухрэ илъэс 80 ирокъу» юбилей медалыр.
Дамыгъэр хуагъэфэщащ Хэку зауэшхуэм и ветеран, а илъэсхэм лэжьа икIи щIэныгъэхэмкIэ кандидат япэу хъуа адыгэ бзылъхугъэ КIуащ Тамарэ Хьэзрэт и пхъум. Ар 1927 гъэм накъыгъэм и 20-м Аргудан къуажэм къыщалъхуащ. Нэмыцэ зэрыпхъуакIуэхэр ди республикэм къыщизэрыгуа илъэсхэм илъэс 15 хъуа къудейт. 1945 гъэм абы къиухащ Къэбэрдей-Балъкъэр пединститутым литературэмкIэ и факультетыр. ИужькIэ Москва дэт ЩIэныгъэхэмкIэ Урысей академием бзэщIэныгъэхэмкIэ и институтым и аспирантурэм щIэтIысхьащ. Тамарэ Налшык къигъэзэжа нэужь, и лэжьыгъэм щыпищащ щIэныгъэ-къэхутакIуэ институтым. 1963 гъэм ар хахащ КъБАССР-м и Совет Нэхъыщхьэм и депутату, Президиумым и унафэщIым и къуэдзэ къулыкъури щигъэзэщIащ.
1978 гъэм къыщыщIэдзауэ 2015 гъэ пщIондэ КIуащ Тамарэ КъБКъУ-м адыгэбзэмрэ адыгэ литературэмкIэ и кафедрэм щылэжьащ, егъэджакIуэ нэхъыжьу, доценту. Къэбэрдей-шэрджэсыбзэм и иджырей пэжырытхэр (орфографиер) къэзыщта къэпщытакIуэ гупым и унафэщIу щытащ.
КIуащым и зэфIэкIым къэрал дамыгъэ куэд къыпэкIуащ. Абыхэм яхэтщ Хэку зауэшхуэм и илъэсхэм и гуащIэм къыхуагъэфэща медалхэри, Лэжьыгъэм и ветеран цIэри. И ныбжьымрэ узыншагъэм къызэримытIасэмрэ къыхэкIыу, Тамарэ мы зэIущIэм къэкIуэфакъым, ауэ хуагъэфэща медалыр иратыжащ и къуэрылъху Iулыдж Азэмэт. ЩIалэм университетымрэ Ветеранхэм я советымрэ фIыщIэ яхуищIащ, нэхъыжьхэм хуащI гулъытэмрэ пщIэмрэ папщIэ. «Си анэшхуэм сыт щыгъуи зэфIэкIышхуэ бгъэдэлъащ. Абы дропагэ. Университетым зэрыщымылэжьэжрэ куэд щIами, ноби ар зэращымыгъупщэр икъукIэ ди гуапэщ», - жиIащ Азэмэт.
Адыгэбзэмрэ адыгэ литературэмкIэ кафедрэм и лэжьакIуэхэр КIуащ Тамарэ ехъуэхъужащ узыншагъэ быдэ иIэну.
Гу зылъытапхъэ: «1941 - 1945 гъэхэм екIуэкIа Хэку зауэшхуэр зэриухрэ илъэс 80 ирокъу» юбилей медалыр УФ-м и Президентым и унафэкIэ 2024 гъэм и фокIадэм къыдагъэкIащ. Ар ират Хэку зауэшхуэм и ветеранхэм, а илъэсхэм лэжьахэм, Ленинград блокадэм хиубыдахэм, Сталинградрэ Севастополрэ щыпсэуахэм, нэмыцэ концлагерхэм балигъ ныбжьым нэмысауэ исахэм.
БАГЪЭТЫР Луизэ.
