КъБР-м и Iэтащхьэ КIуэкIуэ Казбек хэтщ Минеральные Воды къалэм щекIуэкI Кавказ инвестицэ зэхуэсышхуэм. Абы кърихьэлIащ хьэрычэт IуэхущIапIэ инхэм, къэ­-рал органхэм я лIыкIуэхэр, къэпщы­та­кIуэхэр, хъыбарегъащIэ IэнатIэ­хэр.

Къэбэрдей-Балъкъэрым а зэхуэ­сым щегъэлъагъуэ турист-рекреацэ, мэкъумэш, продукцэ къыщIэзыгъэкI IэнатIэхэм щиIэ Iэмалхэр, республикэм и компание 200-м нэблагъэм щыщхэм я зэфIэкIхэр зыхуэдэр хэIущIыIу щащI.
ЗэIущIэшхуэм ипкъ иткIэ КIуэкIуэ Казбек хэтащ «Иджырей щытыкIэм иту къэралым жыг хадэхэр щыгъэ­кIыныр: абы и ефIэкIыныгъэхэр, зы­Iууэ гугъуехьхэмрэ абыхэм я хэ­кIы­пIэхэр къэгъуэтынымрэ» зыфIаща ­сессием.
ЩIыналъэм и унафэщIым къыхигъэщащ зи гугъу ящIыр къэралым и мэкъумэш IэнатIэм и унэтIыныгъэ нэхъыщхьэхэм зэращыщыр:
- Иджыпсту мыр мыхьэнэшхуэ зиIэ Iуэхущ, псом хуэмыдэу Кавказ Ищхъэрэм хыхьэ щIыналъэхэм я дежкIэ. Апхуэдэ мыхьэнэшхуэ щIиIэри абы ерыскъыпхъэ шынагъуэншагъэр къы­зэрызэригъэпэщырщ, экономикэми хэлъхьэныгъэ зэрыхуищIырщ. Къэ­бэр­дей-Балъкъэрыр къапщтэмэ, дэ тхужыIэнущ республикэм и жыггъэкIхэм я цIэр фIыкIэ щыжаIэу щыта зэманым къызэригъэзэжыр. Си гум къыбгъэдэкIыу фIыщIэ яхуэсщIыну сыхуейщ мэкъумэшыщIэхэм, щIым телэжьыхь, а ерыскъы лIэужьыгъуэр къэзыгъэкI цIыхухэм. Пэж дыдэу, ар икъукIэ лэжьыгъэ гугъущ, ауэ абы гурэ псэкIэ яужь итщ ахэр. Къэбэрдей-Балъкъэрым и мэкъумэшы­щIэ­хэм иджыри ехъулIэныгъэщIэхэр къызэрахьынур си фIэщ мэхъу.
Нобэ Къэбэрдей-Балъкъэрым бжьы­пэр иIыгъщ пхъэщхьэмыщхьэ-мэракIуэхэкIхэр къехьэлIэнымкIэ. 2024 гъэм пхъэщхьэмыщхьэрэ мэра­кIуэу IуэхущIапIэ псоми зэхэту кърахьэлIэжар тонн 1027-рэ мэхъу - ар процент 30,7-кIэ нэхъыбэщ 2023    гъэм яхузэфIэкIам нэхърэ. Ар къэралым пхъэщхьэмыщхьэрэ мэракIуэхэ­- кIыу къыщагъэкIам и процент 25-рэ мэхъу.
КIуэкIуэ Казбек къыхигъэщащ апхуэдэ ехъулIэныгъэхэр къэралым мэкъумэш IэнатIэм хуищI гулъытэм зэрыхэхъуам, Урысейм Мэкъумэш ­хозяйствэмкIэ и министерствэм и дэIэпыкъуныгъэм зэрафIыгъэр.
- Урысейм Мэкъумэш хозяйствэмкIэ и министерствэм а лэжьыгъэр нэхъри щIегъэхуабжьэ. Дэ ар республикэм и экономикэм, а IэнатIэм зегъэу­жьы­ным щызыхыдощIэ. Аращ лъабжьэ хуэхъуар пхъэщхьэмыщхьэ тонн мел­уаным, жыгыщIэхэр ди деж къызэ­рыщагъэкIыжым, хадэщIэхэр зэрыхасэм. Нобэм ирихьэлIэу дэ жыг хадэу гектар мин 27-м щIигъу диIэщ, абыхэм ящыщу мин 23-м щIигъур псынщIэу къызыпыкIэ лIэужьыгъуэ­хэм хуэдэу. Дэ гулъытэшхуэ худощI а унэтIыныгъэм, - жиIащ КъБР-м и Iэтащхьэм.
Къэбэрдей-Балъкъэрым и закъуэщ жыг хадэ гъэкIыным хуэунэтIа Iуэху псори зэпыщIауэ щызэфIагъэкIыфыр - жыг гъэтIысхьэнхэр къэгъэкIыжы­ным, жыгхэр зыIыгъыну пкъохэр гъэжыным къыщыщIэдзауэ ахэр зралъхьэну пластик ашыкхэр нэгъунэ щIыным нэсу. Илъэс къэс фIагъ ­лъагэ зиIэ жыг цIыкIуу мелуани 2,8-рэ къыдогъэкIри, мелуаным щIигъур адрей щIыналъэхэм яхудогъашэ. Ди продукцэ гъэтIылъыгъэхэм илъэс ­хъурейм щIэупщIэ яIэщ икIи сату щIы­пIэхэм хурагъашэ пхъэщхьэ­мыщхьэ къыпычыжыгъуэщIэр къэ­сыху. Ар зи фIыгъэр зэуэ пхъэщ­хьэмыщхьэ тонн мин 330-м щIигъу зыщIэхуэн хъумапIэ лъэщхэр зэраухуарщ. Ди мурадщ абыхэм дяпэкIи къахэдгъэхъуэну икIи 2030 гъэм ирихьэлIэу ахэр хуэдитIым щIигъукIэ нэхъыбэ тщIыну.
ДызыхуэкIуэ зэманым къапэщыт къалэнхэм ящыщу КIуэкIуэ Казбек къигъэлъэгъуащ лэжьакIуэхэр гъэхьэ­зырыным, къэкIыгъэхэм елэжьыным ехьэлIа щIэныгъэ-практикэ Iуэхухэр егъэфIэкIуэныр.
ЗэIущIэм и къызэгъэпэщакIуэ, Ставрополь крайм  и ЖыггъэкIхэм я зэгухьэныгъэм и унафэщI Ширинов Айдын КIуэкIуэ Казбек и къэпсэ­лъэныгъэм и гугъу щищIым къыхигъэщащ щIыхэр фейдэ нэхъыбэ ­  къату къэгъэсэбэпынымкIэ Къэбэр­­-дей-­Балъкъэрыр щапхъэу зэрыщы­тыр.
- Пхъэщхьэмыщхьэ къехьэлIэнымкIэ Къэбэрдей-Балъкъэрым бжьыпэр зэриIыгъым къыдэкIуэу, ахэр хъумэ­нымкIи пашэщ. Апхуэдэуи ар щапхъэу бгъэлъагъуэ хъунущ а псори зэгъэзэхуауэ къэгъэсэбэпынымкIэ, сыту жыпIэмэ абыхэм я лэжьыгъэр тэмэму зэтеухуащ. Иджыри зэ зызу­мысыжынщи, абыхэм дэ куэдкIэ щапхъэ ятыдох. Абыхэм я дежкIэ а унэтIыныгъэр нэхъ гугъущ, сыту жы­пIэмэ, ахэр щылъагъуэхэшщ абы. Ди дежкIэ нэхъ тыншщ, я лъэужьым диту докIуэри, я проект нэхъыфIхэр къыдогъэсэбэпри.
Ширинов Айдын КIуэкIуэ Казбек фIыщIэ къыхуищIащ щIыналъэм и мэкъумэш IэнатIэм и нэIэ зэрытетым, абы теухуа зэIущIэхэм зэрыхэтым ­папщIэ.
Республикэм и Iэтащхьэр хуэзащ Къэзахъстан Республикэм и полномочнэ лIыкIуэу Урысей Федерацэм щыIэ Абаев Даурен. Ахэр тепсэлъы­хьащ социально-экономикэ IэнатIэм зэдэлэжьэнымкIэ щыIэ Iэмалхэм.
Урысейм политикэ, экэномикэ унэтIыныгъэхэм щилэжьэгъу нэхъ инхэм икIи къэзыгъэпэжхэм ящыщщ Къэзахъстаныр. Мы зэман гугъум къэралитIыр зэпыщIауэ щытыным мыхьэнэшхуэ зэриIэр къыхагъэщ Урысейм и Президент Путин Владимири Къэзахъстаным и Президент ­Токаев Къасым-Жомарти.
«Къэбэрдей-Балъкъэрымрэ Къэзахъстанымрэ сатууэ зэдащIым хуэдищкIэ хэхъуащ иужьрей илъэсхэм. Ди республикэм Къэзахъстаным ­хурегъашэ гъавапхъэ къэкIыгъэхэр, крахмалыр, гъэшхэкIхэр, IэфIыкIэхэр, псыхэкI зэмылIэужьыгъуэхэр, налмэсым къыхэщIыкIа Iэмэпсымэхэр. КъэралитIым дзыхь зэхуащIу зэдэ­лэжьэным Къэбэрдей-Балъкъэрым адэкIи хэлъхьэныгъэ хуищIыну хьэ­зырщ. Дэ ди зэпыщIэныгъэхэм зэры­зедгъэубгъун Iэмалхэр куэд дыдэ хъууэ къызолъытэ, ар щэнхабзэ-туризм, щэнхабзэ-псапащIэ Iуэхухэрщ, цIыху­хэм щIэныгъэ нэхъыщхьэ егъэгъуэ­тын, узыншагъэр хъумэн унэтIыныгъэхэрщ. Ди зэпыщIэныгъэхэр гъэбы­дэным хуэунэтIа лэжьыгъэм адэкIи пытщэнщ», - жиIащ КIуэкIуэ Казбек зэIущIэ нэужьым.
ЩIыналъэхэм я унафэщIхэм ящIыгъуу КIуэкIуэ Казбек хэтащ «ЛIы­хъужьхэм къагъэзэж: Кавказ Ищхъэрэм и зыгъэпсэхупIэхэм абыхэм я узыншагъэр щегъэфIэкIуэжын» зэIущIэм.
Ар мыхьэнэшхуэ зиIэ социальнэ Iуэхущ икIи Къэбэрдей-Балъкъэрым Дзэ Iуэху хэхам хэтахэм защIэгъэ­къуэным теухуа программэр 2023 гъэм къыщыщIэдзауэ щолажьэ. Абыхэм апхуэдэ IуэхухэмкIэ зыхуагъазэ хъунущ «Хэкум и хъумакIуэхэр» фондым и щIыналъэ къудамэм, езыхэр зыщыщ щIыпIэхэм я муниципалитетхэм а Iуэхур щызэкIэлъызыгъакIуэ­хэм.
«Дзэ Iуэху хэхам хэтахэмрэ абыхэм я унагъуэхэм щыщхэмрэ зыхуеину дэIэпыкъуныгъэхэр иратынымкIэ «Налшык» курортым Iэмал псори щыIэщ, - жиIащ КIуэкIуэ Казбек - Ди щIыналъэм щолажьэ зыгъэпсэхупIэ 20-м щIигъу, псори зэхэту цIыху минитхум щIигъу зэуэ щIэхуэну, узыншагъэр зэфIэгъэувэжыным хуэщIа IэзэкIэхэр къагъэсэбэпу. ИкIи дэ дыхьэзырщ дзэ Iуэху хэхам хэтахэр зыщыщ щIыпIэм емылъытауэ ахэр къедгъэблэгъэну.
Ди къэралым и шынагъуэншагъэр, ди щIэблэхэм я къэкIуэнур нобэ зы­хъумэ, ди зэIузэпэщыгъэм щIэбэн ди лIыхъужь псоми, ветеранхэмрэ дзэ къулыкъум хэтхэмрэ си щхьэр яхузогъэщхъ».