Кёп болмай Къабарты-Малкъар къырал университетде юристлени  тёртюнчю  халкъла аралы илму-излем конференциялары болгъанды. Анда   хакъсыз  болушлукъ тапдырыуну   амаллары эм къыйматлыгъы да  сюзюлгенди.

Жыйылыугъа Россейден эм тыш къыралладан экспертле: власть органланы, юрист бюроланы келечилери, алимле, нотариусла, адвокатла, студентле эм аспирантла  къатышхандыла. Аны магъанасы жамауатха тийишли эм хакъсыз  юридический болушлукъ берилирча амалланы жарашдырыу болгъанды.

Ол кюн сыйлы къонакъланы санында  Россей Федерацияны  Президентини  Шимал-Кавказ федерал округда толу эркинликли келечисини орунбасары Владимир Надыкто,  полпредни болушлукъчусу  Айдамир Валиев, Юстиция министерствону КъМР-де Управлениясыны  ашчысы Къужонланы Жантемир, Нальчикде аскер  гарнизон  сюдню председатели  Ахмед Мальбахов,  «Къырал  юридический  бюро» учрежденияны таматасы Муаед Хабачиров эм  нотариал палатаны бёлюмюню президенти   Майя Хакулова болгъандыла.

КъМКъУ-ну ректоруну къуллугъун толтургъан   Юрий Альтудов конференцияны  ача, хакъсыз юридический болушлукъ бериу институтну айнытыуну  магъаналы атламгъа санаргъа боллугъун,  ол социал жаны бла жамауатха ахшы билеклик этеригин да белгилегенди.

Ызы бла Владимир Надыкто, жыйылгъанланы алгъышлай,   конференция  бир бирге сынамларындан билдирген, къыйматлы амалла бла шагъырейлендирген, эсгертиуле берген  жер боллугъуна ийнанганын  айтханды.   

Айдамир Валиев да  хакъсыз юридический болушлукъ бериу право къыралны  баш  борчларындан бири болгъанын чертгенди.  Айтылгъан сёзлеге къошула,  Къужонланы Жантемир да къырал  эм   жамауат организацияла бирикмей,  бу жаны бла жетишимли ишлерге   жарамазлыгъын  эсге салгъанды.  
Тюбешиуде тематикалы   кёп тюрлю соруу сюзюлгенди. Ол санда юридический болушлукъну качествосуна, бу жаны бла адамланы  билимлерин ёсдюрюуге, хакъсыз болушлукъ этилирча жандауурлукъну  айнытыугъа эм башхаларына да къаралгъанды.  Аны бла бирге    КъМКъУ-ну студентлери бла Нальчикни 29-чу номерли гимназиясыны прокурор классыны окъуучулары жарашдыргъан ишлеге  энчи эс бурулгъанды.

Ахырында чыгъарылгъан эсеплеге кёре жыйымдыкъ китап басмаларча материалла жыйылгъандыла.  Айырмалы ишле уа   «Право эм къырал: теория эм практика» журналда чыгъарыкъдыла. 

Эсге сала айтсакъ,  конференция КъМКъУ, «Къырал юридический бюро» эм РФ-ни  Юстициясыны республикада управлениясы къурап бардырылгъанды.

Магометланы Сулейман.