Бу кюнледе «Жашау этерге инфраструктура» миллет проектге кёре, къыралны магъаналы сеьтлерине кирген Прохладнагъа баргъан  Новопавловск-Прохладный-Моздок жолну 6,5 километр кесегине тынгылы ремонт этип кюрешедиле. 

Ол Прохладный шахарны Магистральная эм Первомайская ара орамларына къошулгъан социал магъаналы объектди. Бусагъатда специалистле эски асфальтни кетерип, мурдорун кючлеп, жангы бордюрла салып бошагъандыла. Жууукъ заманда экинчи къат асфальт жаярыкъдыла, тротуарла ишлерикдиле, "зебрала", саллыкъдыла эм къоркъуусузлукъну жалчытырча башха жумушла да тамамланырыкъдыла. 

Быйыл объект хайырланыргъа берилирге керекди.  

Келир жылда Къабарты-Малкъар, Ставрополь край эм Шимал Осетия бирге къошулургъа жолну 7 километрине тынгылы ремонт этилликди. Былайтын суткагъа 10 минг машина жюрюйдю. Аланы иги кесеги ауур жюк ташыгъанладыла. Аны себепли жолну игилиги къоншу регионла бла байламлыкъны кючлеуде ахшы себеплик этерикди.

Саулай алып айтханда, Новопавловск-Прохладный-Моздок жолну иги кючлю эм айбат этерча жангы технологияла бла материалла   хайырланыладыла. Къоркъуусузлукъ жалчытылынырча да аслам эс бурулады.

Магометланы Сулейман.