Жууукъ заманда «Онбиреуленни ышыгъын» жангыртырча келишим этилири  сакъланады. Проектге кёре, белгили объектни къурулушу эки жыл чакълы барлыкъды. Анга  1,8 миллиард сом къоратыллыкъды.  Кавказ.РФ биригиуню башламчылыгъы бла  мекямны архитектура  проекти  хазыр этилгенди.

 «Быйыл 25−27 майда Ставрополь крайда «МинводыЭкспо» кёрмюч арада «Инвестицияла: озгъан, бюгюннгю эм келир заман» деген темагъа аталып, Кавказны инвестициялы форуму боллукъду. Аны чеклеринде  Минги тауну этегинде белгили «Онбиреуленни ышыгъын»  жангыртыча  келишим этерге муратыбыз барды. Кёрмючде аны стенди да кёргюзтюллюкдю.  Муратыбыз толса, быйыл окъуна  къурулушну  башларча  ахча бёллюкбюз»,- дегенди  Шимал-Кавказ федерал округну айнытыу  жаны бла «Кавказ.РФ» акционер обществону  таматасы  Андрей Юмшанов.

Биригиуню баш борчларындан бири 1938 жылда ишленнген эм 1998 жылда кюйген белгили къонакъ юйню алгъыннгы бетин къайтарыргъады. Болсада мекям тюз алгъынча боллукъду деп айтырча тюйюлдю, алай кёпле аны ажашдырмай танырыкъдыла. Аны бла бирге къурулушунда бюгюннгю амалла бла керекле хайырланыллыкъдыла. Саулай алып айтханда, Минги таугъа ёрлегенлеге, ала уа бюгюнлюкде 20 мингден артыкъ боладыла эм  МЧС-ни келечилерине  не жаны бла да  тап болурча эм  къоркъуусузлукълары жалчытылынырча мадарла этилликдиле.

Жангыртылгъан мекям 4100 метр бийикликде орналлыкъды. Ол альпинистле жашагъан тёрт къатлы къонакъ юй боллукъду. Аны биринчи къатысында МЧС-ни таулада ишлеген къаууму ишлерикди. Башхаларында уа 120 адамгъа  отоула бла бёлюмле  къураллыкъдыла.     

Специалистле, журтну планын жарашдырырдан алгъа, жеринде болуп, геодезия эм гидрометеорология жаны бла энчиликлеге эс бургъандыла. Ол санда къар юзюлюуден эм ырхыдан сакъланырча амаллагъа  да эс бургъандыла. Аны бла бирге «Эльбрус» тау курортну  специалистлерини оюмлары да эсге алыннгандыла.     Бусагъада инженер ишлени асламысы   бошалгъандыла. 

Эсге сала айтсакъ, «Онбиреуленниышыгъы» Элбрусда биринчи къонакъ юйдю, саулай Россейде да андан бийикде орналгъаны жокъду. Алтмыш жылны ичинде Минги таугъа чыкъгъан альпинистле, анда туруп, мындагъы хауагъа юйреннгендиле, башхала да солургъа, тёгерек-башха къараргъа чыкъгъандыла.   

Курданланы Сулейман.