Быйыл жылны башындан бери  «Диабетге къажау туруу» регионал проектге кёре  1186  адам  Диабетни школларында билимлерин ёдюрюрге онг тапхандыла, деп билдириледи КъМР-ни Саулукъ сакълау министерствосуну пресс-службасындан.

Бюгюнлюкде Къабарты-Малкъарда аллай 17 школ барды, аладан экиси сабийле бла ишлейдиле. Дерслени кезиуюнде саусузла  тюз ашаргъа, къанларында бал тузну ёлчемин тинтирге юйренедиле. Андан сора да, алагъа  тири жашау бардырырча эм терк-терк специалистлеге къарата турурча  эсгертиуле этиледиле. 

Сабийлеге уа саусуз тенглерине сакъ болургъа эм биринчи медицина болушлукъ берирге эм башха керек затлагъа  юйретедиле.

 Статистикагъа кёре, бюгюнлюкде республикада  эсепде тургъан диабетден  саусузланы саны 23 минг адамгъа жетеди. Алагъа  дайым  специалистле кёз-къулакъ болгъанлай турадыла, ол санда  ауруулары онгламазча эм саулукъларын кючлерча   комплекс халда тийишли профилактика бардырадыла. 

Курданланы Сулейман.