Адыгэхэм я Щыгъуэ махуэм теухуа зэхыхьэхэр республикэм и къалэхэм, къуажэхэм, районхэм щIэщыгъуэу, гукъинэжу щызэхэтащ. Махуэшхуэм хухаха, адыгэ уэрэдыжьхэр щагъэзащIэ «Си Хэку - си уэрэд» фэеплъ-гукъэкIыж пшыхь нэхъыщхьэр «Псэ жыгым» деж щрагъэкIуэкIащ. Ар къызэрагъэпэщащ Урыс-Кавказ зауэр зэриухрэ илъэси 161-рэ щрикъум ирихьэлIэу. Абы зыкърагъэхьэлIащ ди республикэм исхэм, гъунэгъу щIыналъэхэм, хамэ къэралхэм щыпсэу адыгэхэм, ди зэкъуэтыныгъэр, зэкъуэшыныгъэр нэхъри ягъэбыдэн мурадкIэ хэкум къекIуэлIэжахэм.
КъБР-м щIыхь зиIэ и артист, адыгэ фащэ екIур къызыщыпс Хьэмырзэ Ахьмэд зэ-хуэсахэм фIэхъус гуапэ яриха нэужь, жиIащ гъэ къэси, Щыгъуэ махуэм ирихьэлIэу, «Псэ жыг» фэеплъым деж зэлъэпкъэгъухэр зэрыщызэхуэсыр, хуитыныгъэм, Хэкум папщIэ зи псэ зытахэр зэращымыгъупщэм и нэщэнэу. Ар гупсэхуу къеджащ Бемырзэ Мухьэдин итха «Адыгэ лъэпкъым и Iэпкълъэпкъ пщыкIутI» усэм.
- БлэкIам къэгъазэ иIэкъым, блэкIам кIэлъыджэркъым, ауэ икIи ар зыщагъэгъупщэркъым. Нэщхъеягъуэ зиIэм адыгэр щыхуэгузавэкIэ, «Тхьэм пщимыгъэгъупщэкIэ», щIыжиIэр апхуэдэ щхьэусыгъуэщ. Ныщхьэби ди блэкIам дыщриплъэж пшыхьщ. Адыгэм и тхыдэр шыкIэпшынэм къикI макъымрэ джэгуакIуэжьым иуса гъыбзэмрэ хъэрэмэхъищэу хэухуэнащ. Кавказ зауэжьым я хэку яхъумэу, я щхьэхуитыныгъэ щIэзэууэ хэкIуэдахэм, ИстамбылакIуэм ихьахэм, хамэщIыр бэн зыхуэхъуахэм я псэр дунеягъэкIэ Тхьэм къимыгъэхъуапсэкIэ, - жиIащ Хьэмырзэ Ахьмэд.
КIэхумахуэ ФатIимэ къеджащ МахуэлI Нарзан и IэдакъэщIэкI «Куэдыщэ игъэващ си адэжь лъахэм» усэм. УэрэджыIакIуэ Хьэкъул Оксанэ «ИстамбылакIуэ» уэрэдымкIэ абы къыпищащ.
Зэхыхьэм лъэпкъ фащэхэр ящыгъыу къекIуэлIахэм уащыхэплъэкIэ, адыгэ лъэпкъым гъуэгуанэ гугъу къикIуами, и хабзэр, и бзыпхъэр, и бзэр, и нэмысыр зэрихъумэжар нэрылъагъут. Зэхуэсахэр хъуахъуэрт блэкIам кIэлъымыгъыу, къэкIуэнум хуэлажьэу, ди бзэмрэ хабзэмрэ тхъумэжу, ди лъэпкъ жыгым тхьэмпэщIэ къыпыкIэ фIэкIа и къуэпсыр мыгъуу къикIуа илъэс мин бжыгъэм къыпищэу адыгэ лъэпкъыр дяпэкIи псэуну.
Адыгэхэм ди Щыгъуэ махуэм теухуа фэеплъ пшыхьыр ягъэбжьыфIащ республикэм и уэрэджыIакIуэ нэхъыфIхэм ящыщхэу Бэч Азэмэт, Шэрджэс Iэсият, ДыщэкI Артур, ШыкIэбахъуэ Ислъам, Щокъуий Мурат, Дау Iэминэ, «Шэджэм псыкъелъэхэр», «Кавказ» ансамблхэм, шыкIэпшынауэ Еуаз Зубер, пшынауэ Чылар Нэсрэн, ПIаз ФатIимэ, нэгъуэщIхэми. Абы щыIуащ адыгагъэм, ИстамбылакIуэм, анэдэлъхубзэм теухуа усэхэмрэ уэрэдхэмрэ. ИстамбылакIуэ гъуэгуанэм текIуэдахэм, хы ФIыцIэжьым игъэпщкIуахэм я псэм лъысын папщIэ, жьэрымэ пщтыр кърихьэлIахэм Iуагъэхуащ. Пшыхьыр и кIэм щынэблагъэм, шэху уэздыгъэхэр пагъэнащ.
ТЕКIУЖЬ Заретэ.
Сурэтхэр Къарей Элинэ трихащ.
