Минводы къалэм гъэлъэгъуэныгъэ зэхуэмыдэхэр щызэхэпшэ хъууэ дэт «МинВоды Экспо» центрым мы гъэм накъыгъэм и 25 - 27-хэм щекIуэкIыну Кавказ инвестицэ зэхуэсышхуэм Къэбэрдей-Балъкъэрым а унэтIыныгъэмкIэ и зэфIэкIхэр щигъэлъэгъуэнущ. Абы хэтыну республикэм и IуэхущIапIи 130-м нэблагъэм лъэIухэр ятакIэщ. Къэбэрдей-Балъкъэрым и лIыкIуэхэм я пашэу щытынущ КъБР-м и Iэтащхьэ КIуэкIуэ Казбек.

Кавказ Ищхъэрэм и адрей щIыналъэхэм хуэдэуи, ди республикэм езым и стенд щхьэхуэ игъэувынущ. Абы щагъэлъэгъуэнущ КъБР-м и турист-рекреацэ, бжыгъэ, мэкъумэш-промышленнэ, промышленнэ IэнатIэхэм ехьэлIауэ щыIэ инвестицэ зэфIэкIхэр. Псалъэм къыдэкIуэу, макет теплъэхэр яIэу е видео Iэмалхэр къагъэсэбэпу республикэм и пэхуэщIэ зыбжанэ утыку кърахьэнущ. Абы хохьэ джэдкъазыл къыщIэгъэкIыным, «Междуречье» мэкъумэш-техникэ паркым ехьэлIа, Налшык къалэ-курортым и парк щIыпIэхэм зегъэужьыным, IТ-паркым, Шэджэм и хуабэщ комплексым, нэгъуэщIхэми ятеухуа проектхэр.

Абыхэм къадэкIуэу, Къэбэрдей-Балъкъэрым и стендым щагъэлъэгъуэнущ ди щIыналъэм и мэкъумэш-промышленнэ комплексым хэт IуэхущIапIэ инхэм я продукцэхэр. Гъэлъэгъуэныгъэм кърихьэлIэну хьэщIэхэм лъэпкъ шхыныгъуэхэр Iуагъэхуэнущ, мастер-классхэр щатынущ.

Апхуэдэуи ди стендым деж зэIущIэхэр, зэпсэлъэныгъэхэр щрагъэкIуэкIынущ, зэгурыIуэныгъэхэри щызэращIылIэнущ. КъБР-м и лIыкIуэхэр зыщыщ IэнатIэхэм ехьэлIауэ къызэрагъэпэщыну «стIол хъурейхэм», сессиехэм хэтынущ. ЩIалэгъуалэ Iуэхухэри абы къыщаIэтынущ.

Фигу къэдгъэкIыжынщи, мыгъэрей зэхуэсым «Инвестицэ гъуэгуанэ: БлэкIар. Нобэ. Пщэдей» фIэщыгъэр зэрихьэнущ икIи ар хуэунэтIауэ щытынущ щIыналъэхэм я инвестицэ пэхуэщIэхэм, къэралымрэ уней IуэхущIапIэхэмрэ я зэпыщIэныгъэхэм зегъэужьыным, зэрызэдэлэжьэнум теухуа зэгурыIуэныгъэхэр зэщIылIэным.

ХЬЭЩЫКЪУЕЙ Олег.