Уллу Хорламгъа жораланып, Нальчикде «РусГидрону» себеплиги бла жаш спортчуланы араларында талай эришиу ётдюрюлгенди. Ала байрамны белгилер, тёлюлени араларында байламлыкъланы кёргюзтюр, саулукълу жашау бардырыуну оюмларын кенг жаяр мурат бла къуралгъандыла.

Алай бла 29-чу гимназияда 2010 жыллада туугъан къызла волейбол ойнагъандыла. Аладан финалгъа гимназияны бла 1-чи спорт школну къауумлары чыкъгъандыла, биринчи жерни 2:0 эсеп бла школну келечилери алгъандыла. Эм иги ойнагъан София Ким а энчи саугъа бла белгиленнгенди.

Ызы бла усталыкъларын жаш шахматчыла сынагъандыла, хорлагъанлагъа дипломла бла эсде къалырча саугъала берилгендиле. «Спартак» стадионда 20211-2012 жыллада туугъан сабийлени араларында гитче-футболдан эришиулеге аслам адам келгендиле. Матчларын эм ахшы 33-чю мектепни къаууму ётдюргенди, «Нарт» (1-чи спорт школ) – экинчи, 2-чи лицейчиле уа ючюнчю жерлени алгъандыла. Хорлагъан къауумлагъа кубокла, майдалла бла грамотала берилгендиле.

Сабийлени республикада Олимпиада советни башчысы футболдан спортну устасы Александр Заруцкий бла «РусГидрону» регионда бёлюмюню генеральный директору Игорь Кладько саугъалагъандыла. «Спорт, энергетикача, инсандан ётгюрлюкню, нёгерле бла бирге ишлей билиуню, дайымда ёсюуню излейди. Жаш тёлюбюзню айныууна себеплик этген, бирликни кючлеген башламчылыкъланы бардырыугъа болушлукъ этерге уа биз къачан да хазырбыз», - дегенди Игорь Кладько, сабийлени хорламгъа итиниулюклерин белгилей.

Кульчаланы Зульфия.