Жеринден тепдирилмеген мюлклени иелери арт кезиуледе федерал даражалы кадастр ишле бардырылып тебирегенини юсюнден билдириуле алып башлагъандыла. Бирлери анга ийнанмагъандыла, ишекли болгъандыла. Аны къырал угъай, хыйлачыла жибередиле, кеслери да мюлкню къымаргъа неда «Госуслуги» порталгъа кирирге сюедиле дегенле да бардыла. Алай КъМР-ни Экономиканы айнытыу министерствосунда айтханларына кёре уа, ол адамлагъа жиберилген билдириуле тюздюле, сагъынылгъан кадастр ишле бла шагъырейлендиредиле.

Быллай къагъытланы инсанлагъа Роскадастрны Къабарты-Малкъарда бёлюмю ашырады. Федерал кадастр ишлени чеклеринде бизни республикада болгъан реестр халатла кетерилликдиле, жер участкаланы чеклери тюзюрек тохташдырыллыкъдыла, тынгылы къурулуш объектлени тийрелери туура этилликди. Дагъыда Бирикген къырал реестр (ЕГРН) толуракъ боллукъду. «Аны хайырындан мюлклени иелерини эркинликлерин къорууларгъа, берилген жумушланы качествосун да игилендирирге къолдан келликди», - дегенди ведомствону башчысыны къуллугъун толтургъан Юлия Лигидова.

Ишле бары да къыралны ахчасына бардырыладыла, адамла аны ючюн абери тёлерге керекмейдиле. Аланы мюлклерини чеклери бла байламлы информация уа электрон халда жюрютюллюкдю.

Бу жумушну юсюнден «Госуслуги» порталда билдириу кимге келген эсе да, ол арсарлы болса, «Роскадастрны» бёлюмюне 8 (8662) 93-00-17 номер бла сёлешсин.

Министерстводан билдиргенлерича, жеринден тепдирилмеген мюлклени иелерине келишиулюк комиссияны ишини юсюнден билдириу да жиберилликди. Ала анда жер участкаларыны чеклерин тохташдырыргъа, дауларын да туура этерге боллукъдула.

Улбашланы Мурат.