«Россельхознадзор»-м и управленэу Кавказ Ищхъэрэм щыIэм къипщытащ 2025 гъэм и япэ мазиплIым къриубыдэу КИФЩI-м и щIыналъэхэм я пхъэщхьэмыщхьэ продукцэу нэгъуэщI щIыпIэхэм хурагъэшэну ягъэхьэзырахэм я фIагъхэр зыхуэдэр.

Абы и IэщIагъэлIхэм я дэфтэрхэм къызэрыхэщымкIэ, Къэбэрдей-Балъкъэрым къыщагъэкIа пхъэщхьэмыщхьэу УФ-м и нэгъуэщI щIыналъэхэм ярищэм и куэдагъым фIыуэ хэхъуащ. ЖыпIэнурамэ, илъэсым зэрыщIидзэрэ мыIэрысэу тонн мин 79,5-рэ ди республикэм ирашащ - нэгъабэ и апхуэдэ пIалъэм щыIа бжыгъэхэм нэхърэ процент 60-кIэ нэхъыбэ. КъыпачыжагъащIэу экспортым ягъакIуэ пхъэгулъ лIэужьыгъуэхэм я куэдагъми хэхъуащ а пIалъэм – тонн 500-м щIигъу.

Къэбэрдей-Балъкъэрым ираш пхъэщхьэмыщхьэм и куэдагъым зэрыхэхъуэм къыдэкIуэу, ахэр зыщэху щIыналъэхэм я бжыгъэри нэхъыбэ хъууэрэ макIуэ. Ди республикэм къыпыщIа, ахэр нэхъыбэу зыхурагъашэ щIыпIэ гъунэгъухэм къахыхьащ къэралым и КъуэкIыпIэ Жыжьэм щыпсэухэри. Псалъэм папщIэ, Приморскэ крайм, Бурятием, Еврей автономнэ округым я сату щIыпIэхэм ди пхъэщхьэмыщхьэхэр къыщыпхуэщэхунущ. Абыхэм нэмыщI, ди продукцэр зыхурагъашэ щIыналъэхэм къахыхьащ Донецк, Луганск республикэхэри

«Россельхознадзор»-м и IэщIагъэлIхэм зэрыжаIэмкIэ, ди республикэм ираш пхъэщхьэмыщхьэхэр зыхуэдэр ткIийуэ къапщытэ икIи «Мэкъумэш-промышленнэ комплексым и продукцэхэм я фIагъхэмрэ цIыхухэм ехьэлIауэ абыхэм къабгъэдэкIынкIэ хъуну шынагъуэхэр зыхуэдэмрэ къэпщытэнымкIэ къэрал центр» лабораторием иригъэкIуэкIа лэжьыгъэхэм къызэрагъэлъэгъуамкIэ, ахэр псори щыIэ фитосанитар мардэхэм къотIасэ, узыфэхэр япкърыткъым икIи карантиным щIагъэкIуэн шынагъуэхэр халъагъуэркъым.

ХЬЭЩОКЪУЭ Алыдж.