Бу кюнледе  Дагъыстан Республиканы бек эрттегили шахары Дербентде  биринчи кёп жанлы  халкъла аралы конкурс бардырылгъанды. Аны  Дуния Артий комитетни  Шимал Кавказда  бёлюмю къурагъанды. Атына уа  «Дагъыстанны жилтинлери» деп атагъанды. Конкурсха къатышыргъа  Дербентге  Россей Федерацияны  Москва, Саратов, Санкт-Петербург, Екатеринбург, Псков, Пермь шахарларындан, СНГ-ни къыраллары: Адыгеядан, Юг-Осетиядан, Шимал Кавказны республикалары : Къабарты-Малкъардан, Чечен Республикадан, Ингушетиядан,  Къалмукъдан, Дондагъы Ростовдан эмда кёп башха жерледен   художестволу коллективле, театр студияла,  жыргъа, тепсеуге, назму айтыугъа  фахмулары болгъан  мингден артыкъ  адам  келгенди. 

Алты  кюнню ичинде Дербентни бек уллу сахнасы  конкурсха къатышханлагъа берилгенди. Къараучула да  кёп эдиле. Нек дегенде  кеслерини жырда, тепсеуде, назму айтыуда, театр искусствода да  фахмуларын  анда жашагъан кёп миллетлени келечилери  кёргюзтгендиле. Конкурс  хорлагъан бек иги  коллективлени,  энчи артистлени  уллу гала-концертлери  бла бошалгъанды. Конкурсха  къатышханланы барына да  сертификатла, грамотала, саугъала да берилгендиле.

Тюбешиуню ахырында сахнагъа  Дуния Артий комитетни вице-президенти, академик Ауес Бетуганов чыгъып, былай айтханды: «Бу жолгъуча  тюбешиуле, конкурсла, фестивальла Россейни эмда дунияны халкъларыны араларында  маданият-тарых  магъананы сакъларгъа, айнытыргъа, къыралыбызны келир заманы ючюн жууаплылыкъны  сезе билирге юйретедиле. Бюгюн биз, абаданла,  ёсюп келген тёлюге аны юсюнден айтмасакъ, тамбла кеч боллукъду. Дагъыда  бу кюнледе  битеу дунияда тюз ниетли адамла Уллу Ата журт урушда Хорламны 80-жыллыгъын белгилегендиле. Бизни  бу жолгъу акциябыз да анга жораланнганын чертип айтыргъа тийишли кёреме. Быйылгъы жыл Ата журтну къоруулаучусуну жылы болгъаны бла байламлы энди къурарыкъ  акциябыз энчи аскер операциягъа  къатыша тургъан жашлагъа жораланырыкъды. Тепсеулеге, жырлагъа, назму айтыугъа ала да тири къатышырыкъларына ийнанама», -дегенди Ауес Абуевич.

-Каспий тенгизни жагъасында  алты кюнню ичинде  унутулмазлыкъ тюбешиуле болгъандыла, аны хайыры бла биз бурун замандан къалгъан шахарны тарыхыны юсюнден да кёп жангы хапар билгенбиз,-дегендиле  кетип бара  Дагъыстаннга биринчи кере келген къонакъла да.

Холаланы Марзият.