Къабарты-Малкъарны Жамауат палатасында Уллу Ата журт урушха эм аны жигитлерине аталгъан эсгертмеле, скульптурала эм архитектура мекямла къаллай халда  болгъанларын тинтгендиле. Жыйылыугъа власть органланы, жамауат биригиулени эм районлада жамауат палаталаны келечилери, алимле къатышхандыла.

 Республикада маданият хазнаны къырал даражада къоруулау жаны бла управленияны башчысыны орунбасары Тимур Хавжоков белгилегенича, тарых-маданият, тин хазнаны сакълау къырал политикада энчи жерни алады.

 - Бизде эсепде бюгюнлюкде 450 объект бардыла, аладан 116-сы – федерал магъаналары болгъанладыла, ол санда 88 археология эсгертмеледиле, 334-сю – регион магъаналыдыла. Уллу Ата журт урушха жораланнган эсгертмеле тийишлисича халда болурларына тынгылы къаралады. Урушда жан берген аскерчилени эсгертмелери бла объектле 302 боладыла, аладан 220-сы тизмеге кийирилгендиле. Граждан урушха аталгъан – 9, республикада Совет власть тохташханы бла байламлы да 4 эсгертме бардыла, - дегенди ол. 

Эсгертмелени сакълау, жангыртыу аланы законлу иелерини жууаплылыкъларындады. РФ-ни «Ата журтну къоруулай ёлгенлени атларын ёмюрлюк этиу» 4292-1-чи законуну 11-чи статьясына тийишлиликде бу жумушну жер-жерли самоуправление органла толтурургъа керекдиле. Аланы билдириулерине кёре, быйыл 43 эсгертмени жангыртыргъа белгиленеди, 6-сына бюгюнлюкге къаралгъанды. Уллу Хорламны байрамыны аллында шахарланы бла эллени администрациялары, жамауат да къатышып, аланы тийрелери тазаланнганды.

Маданият министрни орунбасары Рита Таова билдиргеннге кёре, 2020 жылдан башлап программаны толтурууну чегинде 84 аскерчи къабыр тапландырылгъандыла, бешисине ала къыралны сакълауунда болгъанларыны юсюнден белгиле салыннгандыла, 512 ёлген аскерчини атлары жазылгъандыла, битеу бу жумушлагъа 120 миллиондан аслам ахча къоратылгъанды. «Батырларыбызны эсгертмелерин сакълау мюлк хазнаны къоруулау бла чекленмейди, бек алгъа, ол миллет кёргюзтген жигитликни ёмюрлени ичи бла ётдюрюудю. Тарых магъаналы жерлени жангыртыу, алагъа сакъ болуу ёсе келген тёлюлени юйретиуде да энчи жерни алады, аланы кёз къарамлары дуниягъа тюз, таза болуруна себеплик этеди», - деп чертгенди ол.

Палатаны маданият, тин хазнаны сакълау эмда асламлы информация органла жаны бла комиссиясыны таматасы Феликс Наков муниципал жамауат палаталагъа районлада болгъан эсгертмелени халларын тинтирге, палатаны башчысы Хазратали Бердов а коммерциялы болмагъан организацияланы бла жамауат биригиулени да бу жумушха къошумчулукъ этерге чакъыргъандыла. «Уллу Ата журт урушну эсгертмелери къыралыбызны хар инсанына да бирликни сезимин береди, ала ата-бабаларыбызны жигитликлерин туура этгенлей турадыла, тёлюлени араларында байламлыкъланы кючлейдиле. Эсгертмелени алларында уллу къырал эм жамауат байрамла, жыйылыула къураладыла. Аны ючюн аланы сакълау, жангы тёлюлеге ётдюрюу россе      йлилени хар жангы тёлюсю айтхылыкъ тарыхыбызгъа хурмет этерини мурдоруду», - дегенди Хазратали Александрович.

Жыйылыуну эсеплерине кёре сейирлери болгъан органлагъа эсгертиуле жарашдырылгъандыла.

Кульчаланы Зульфия.