Кёп болмай Нальчикде Юг федерал округну хирургларыны  сегизинчи  конгрессини ачылыуу болгъанды.  Аны кезиуюнде  Россейни хирургларыны  обществосу  Къабарты-Малкъар къырал университетни  медицина академиясыны  таматасы, медицина илмуланы доктору, профессор Мызыланы Исмайылны   академик  Владимир Фёдоров  атлы алтын майдал бла саугъалагъанды.

Аллай даражалы саугъагъа Мызы улу  хируругияны айнытыугъа уллу къыйын салгъаны ючюн тийишли болгъанды.  Ол КъМР-ни сыйлы илму ишчисиди эм врачыды, республиканы хирургларыны биригиуюню председателиди, Россейни саулукъ сакълау  министерствосуну хирургия жаны бла проблемный  комиссиясыны члениди эм белгилеп айтырча  башха кёп даражалы атлагъа  бла саугъала тийишлиди.

Исмаил Алимович бюгюнлюкде билимли эм сынамлы специалистледен бирине саналады. Аны хирургияны айнытыу жаны бла къыйыны  республикадан тышында уллуду.  Ол хирургияны кёп тюрлюсю бла кюрешеди. Ол тизмеде   биринчи болушлукъ этилген, ауур жарала алгъаннга,  онкологиядан къыйналгъаннга этилген  эм пластика хирургияланы айтыргъа  боллукъду. Аны бла бирге ол бюгюнлюкде хирургия жаны бла ауруулагъа  диагностика этерча  эм багъарча жангы  амалланы  иги кесегин  сингдиргенин да энчи чертирчады. 

Бизни корр.