Кёп болмай  КъМР-ни Транспорт эмда жол мюлк министерствосуну жамауат советини таматасы Ануарбий Суншев жол мюлк управленияны келечилери бла бирге Терк бла Май районлада тынгылы ремонт ишле къалай баргъанларына къарагъандыла, деп билдириледи ведомствону пресс-службасындан.    

Терк районда быйыл «Жашау этерге инфраструктура» миллет проектге кёре юч объектге къараллыкъды. Ол санда  Дейское элде Шауцукова орамны 4,1 километр тенгли бири, Шимал Осетия бла чекде  Дейское-Тёбен Курпну 5,8 километр чакълы кесеги эм  Огъары эм Тёбен Курп эллеге баргъан  жолну да 4,8 километри   жангыртыллыкъды.

 Май  районда да  Майский – Урожайное жолда Терекни кёпюрю жангыртылады,  Нальчик - Майский эм Александровская - Озрек жоллагъа да  тынгылы ремонт этилликди.

Сагъынылгъан объектле битселе,  бюгюннгю   мардалагъа келиширча боллукъдула. Ол санда ишлени кезиуюнде жолланы мурдорларын кючлерикдиле, тротуарла саллыкъдыла, асфальт жаярыкъдыла, къоркъуусузлукъ жалчытылынырча да аслам эс буруллукъду.   Дейское,  Александровская, Огъары  эм Тёбен  Курплада да чыпынлы чыракъла жарашдырыллыкъдыла.

 Комиссияны келечилери кёргенлерине бюсюрегендиле, къаллай материалла, технологияла хайырланнганларына эм  ишле болжалдан кеч къалмай бошалырларына да аслам  эс бургъандыла. Бир тюрлю  кемчиликсиз да болмагъанды, аланы да  жууукъ заманда кетерирча эсгертиуле берилгендиле.

Курданланы Сулейман.