Бу кюнледе РФ-ини МЧС-ни Баш управлениясы къурап, «Газдан бла тютюнден сакълау службаны бек иги от ёчюлтюучю къаууму» деген республикалы эришиу бардырылгъанды. Ол Россейни МЧС-ини 35-жыллыгъына жораланнганды.

Анга бу жол регионну 14 командасы къатышхандыла. Конкурс 4 кезиуден къуралгъанды. Аладан бири теория, къалгъан ючюсю уа практика халда ётгендиле.

Практикада 4-чю этажда от тюшюп, адамланы къаутхарыргъа керек эди. Букъудан толгъан отоугъа кирип, къыйын болумгъа тюшгенлеге болушлукъ тапдырыуда усталыкъларын ачыкълагъандыла. Автокранны хайырлана адамланы тюшюрюп, медицина болушлукъ тапдырлыкълагъа бергендиле. Жюри балланы ала белгиленнген борчланы терк эм халатсыз къалай толтургъанларына кёре салгъанды.

Эсеплеге кёре, биринчи жерге 19-чу от ёчюлтюучю-къутхарыу службаны келечилери чыкъгъандыла. Аланы ызларындан специализацияланнган от ёчюлтюучю службаны къутхарыучулары тохташхандыла. Ючюнчюле уа 1-чи номерли от ёчюлтюучю-къутхарыу службаны командасы болгъанды.

Бу эришиу  къутхарыучуланы хазырлыкълары тийишли даражада болгъанын кезиулю кере ачыкълагъанды.

Къасымланы Аминат.