Мы махуэхэм Урысейм щокIуэкI «Кедры Великой Победы» Iуэхур. Я лэжьыгъэм пэрыту Хэку зауэшхуэм хэкIуэда журналистхэм я щIыхькIэ жыг хадэхэр щыхасэ УФ-м и щIыналъэ зэмылIэужьыгъуэ­хэм. 

Налшык къалэм дэт Печатым и унэ дэтым и щIыбагъ хадэм псей щхъуантIэхэр щыхасащ, ди республикэм щыщу ­Хэку зауэшхуэм и лъэхъэнэм зи гъащIэр зыта ди лэжьэгъухэм я фэеплъу. 
Хэкур яхъумэу, я къалэмыр ягъабзэу зауэм хэкIуэда журналистхэр ягу къагъэкIыжащ а ­махуэм икIи фэеплъыр цIыху­бэм ящымыгъупщэн, зыщIэбэна мамыр гъащIэм абыхэм я цIэ­хэр къыщраIуэн папщIэ гъэмахуэми щIымахуэми щхъуантIэ псейхэр ягъэтIысащ. 
ЗэIущIэм хэтащ КъБР-м бжыгъэхэр зи лъабжьэ зыужьыныгъэмкIэ, связымрэ цIыхубэ зэ­пыщIэныгъэхэмкIэ и министр Бозий Аскэр, «КъБР-Медиа» къэрал IуэхущIапIэм и тхьэмадэ Бежан Беслъэн, абы и къуэдзэ Дзыгъул МуIэед, газетхэм, журналхэм, хъыбарегъащIэ агентствэм я редактор нэхъы­щхьэ­хэмрэ абыхэм я къуэдзэхэмрэ, телевиденэм, радиом я уна­фэщIхэр, журналистхэр. 
- Мы гъэр Хэкум и хъумакIуэм и илъэсу ягъэуващи, Iуэху дахэ куэд ирагъэкIуэкI ветеранхэм я щIыхькIэ. Нобэ республикэм къыщетхьэжьари абыхэм ящыщщ. Къэрал псом щрагъэкIуэкI я IэнатIэм пэрыту Хэку зауэшхуэм хэкIуэда журналистхэм я фэеплъыр игъащIэкIэ ­ялъытэным теухуа Iуэху. Дэри г­ъащIэм къыпызыщэ жыгхэмкIэ, ди республикэм фIыуэ къыщыкI псей щхъуантIэхэмкIэ дыхэуващ абы. 
Зауэр щекIуэкIым деж хъы­бар­егъащIэ IэнатIэми мыхьэнэ­ш­хуэ иIэщ. ЦIыхухэм пэжыр ящIэн хуейщ. Апхуэдэ къалэным пэ­рыту нэхъ лъапIэ дыдэу яIэр - я гъащIэр - ятащ ди лэжьэгъухэм. Иджыпстуи ды­зыхэпсэукI зэманым пэжыр къэдгъэлъэгъуэфу, цIыхубэм я гупсысэр дунэ­тIу, ди япэ итахэм щапхъэ ятетхыу, я фэеплъыр тхъумэу ди лэжьыгъэм дыпэ­рытыныр ди къалэнщ, - жиIащ Бозий Аскэр. 
КъулыкъущIэхэмрэ журналистхэмрэ Печатым и унэм и 8-нэ 10-нэ къатхэм фIэлъ фэ­еплъ пхъэбгъухэм деж удз гъэ­гъахэр щагъэтIылъащ. «Адыгэ псалъэ» газетым и лэжьакIуэу зауэм хэкIуэдахэм я гугъу къы­зэхуэсахэм яхуищIащ КъБР-м щIыхь зиIэ и журналист, егъэ­джэныгъэмрэ щIэныгъэмкIэ къудамэм и унафэщI Жыласэ Маритэ, Хэку зауэшхуэм хэкIуэда балъкъэр журналистхэм я фэеплъыр зэрахъумэм и гугъу ищIащ «Заман» газетым и редактор нэхъыщхьэ Конаков Хьэсэн. 

НэщIэпыджэ Замирэ. Сурэтхэр Къарей Элинэ трихащ.