Кёп болмай Къабарты-Малкъар къырал университетни  электроника, робототехника эм жалгъан акъыл жаны бла   институтуну «Информация къоркъуусузлукъ» бёлюмюнде окъугъан студентле Нальчикде  «ВымпелКом»  биригиуде болуп,  иши бла шагъырейленнгендиле. Жолоучулукъ  «Къорууланнган информация  системала» деген дерсни чеклеринде къуралгъанды.

Аны кезиуюнде  жаш  адамла  информация  къоркъуусузлукъну,  жалчытыуну,  амалларыны эм башха магъаналы затланы  юслеринден толуракъ билгендиле.  Дагъыда сотовый операторланы ишлеринден да хапарлы болгъандыла.

- Биз студентлеге   информацияны къоркъуусузлугъу къалай  жалчытылыннганын,  бу жаны бла гитче эм магъанасыз зат болмагъанын ангылатыргъа сюйгенбиз,- дегенди   «Вымпелком» биригуню бёлюмюню  техника жаны бла таматасы Къазийланы  Борис.

Компьютер технологияла эм  информация къоркъуусузлукъ жаны бла кафедраны  тамата  преподаватели Аслан Таов да  быллай жолоучулукъла  жашауларын бу жаны бла байламлы кёрген студентлеге усталыкъларыны  юсюнден толуракъ билирге, сынамларын ёсдюрюрге онг бергенлерин белгилегенди. 

Ала ишлери  жаланда  программирование бла чекленип къалмай, команданы санында ишлеуню магъанасын, энчи  жууаплылыкъларын эм жангы технологияла бла кюреше билирге кереклерине  да   тюшюннгендиле.

Бу жол  «ВымпелКом» бла Электроника, робототехника эм жалгъан акъыл жаны бла   институт бла байламлыкъда ишлерге келишгендиле.  Анга кёре  студентле  мында стажировкаларын ётерге, бирге къыйматлы проектлеге къатышыргъа да  онг табарыкъдыла.

Курданланы Сулейман хазырлагъанды.