Арт жыллада кёп жерлешлерибиз Россейни башха-башха шахарларында ишге тохтайдыла, жетишимли болуп, атларын иги бла айтдырадыла. Бу хапарыбыз Созайланы Борисни къызы Халиматны юсюнденди.
Халимат 1992 жылда Нальчикде медколледжни бошагъанды. Андан сора шахарда кардиология диспансерде медсестра болуп ишлеп тебирегенди. Иш кёллюлюгю бла къыз атын иги бла айтдыралгъанды. Доктор буюргъан багъыуланы этгенден сора да, къыйын ауругъанланы къатларында олтуруп, ала бла ушакъ эте, къайгъыларын чача тургъанды. Аладан кёп ариу сёзле, алгъышла да эшитгенди.
2010 жылда анга ара шахарыбыз Москвагъа кёчерге тюшгенди. Андан бери ол андады. Алгъа 67-чи номерли поликлиникасында участка медсестра болуп ишге тохтагъан эди. Кесине бёлюннген жерде саусузлагъа барып, доктор алагъа буюргъан багъыуну этип тургъанды. Ол ишинде да кесин иги жаны бла кёргюзтгенди. Халимат къарагъан саусузла аны юсюнден поликлиниканы оноучуларына терк-терк айта тургъандыла.
2019 жылда Москваны мэри Сергей Собянинни оноуу бла ара шахарда патронаж служба къуралады. Анда уруннган врачла, медсестрала абадан адамланы юйлерине, жашагъан жерлерине барып, аланы саулукъларын тинтип, анга кёре багъыу бардырадыла. Бу иш башланнган кюнден да Халимат андады.
Кюн сайын 10-15 адамны юйюне барып, халларын кёрюп, докторгъа билдиреди. Ол да кеси жанындан, ала бла жолугъуп, жарсыуларына тынгылайды. Неден, къалай ауругъанларын тохташдыргъандан сора багъыу буюрулады. Ол ишни уа биягъы Халимат бардырады. Дарман салгъандан сора да, къатларында туруп, халлерине къарайды. Анализлерин да алып, лабораториягъа ётдюреди.
Халимат къарагъан саусузла абадан адамладыла. Аланы къан басымлары кётюрюледи, жюреклери ауруйду. Билмей тургъанлай ауруулары къозгъалыргъа да болады. Ол а, ишин бошап кетгенден сора да, алагъа телефон бла сёлешип, хапар биледи. Аланы бир-бирлери отоуларындан окъуна чыгъалмайдыла. Жууукълары болмай, жангыз кеслери жашагъанла да боладыла. Аланы да дарман бла Халимат жалчытады. Бир-бирлерини жууукълары бла да байламлыкъ жюрютеди. Саусузларыны юсюнден алагъа сёлешип, билдирип турады.
Ковидни кезиуюнде уа ол бир кюн солумай ишлегенди, къоркъуусуз кийимлени, маскаланы хазна юсюнден тешмей. Кюн сайын саусузларына барып, халлерин тинтип, тийишлисича багъып тургъанды.
Ол къыйын заманла да энди кетдиле. Халиматны иши бираз женгилирек да болгъанды, алай абаданлагъа дайым кёз-къулакъ болгъанлай турургъа уа керекди. Ол ишин бюгюн да тынгылы бардырады, саусузладан ыразылыкъ таба.
Ала бары да тергелген болур эдиле 2021 жылда анга Сергей Собянин къол салып, «Москва шахарны саулукъ сакълаууну махтаулу ишчиси» деген сыйлы ат берилгенде. Миллионла бла адамла жашагъан уллу шахарда таулу къызгъа аллай даражагъа жетгени уллу сый-намысды.
Юйюрюню юсюнден айтханда, бир къыз ёсдюреди. Ол школну бошагъандан сора Москвада Биринчи медицина университетде билим алып, бюгюнлюкде анасы ишлеген поликлиникада врачды.
Созайланы Халимат а узакъ ара шахарда орналгъан эсе да, элин-журтун, адамларын унутмайды. Онг болгъаны сайын бери келип, аланы жокълап, тансыгъын алыучуду.
Османланы Хыйса
