Накъыгъэм и пэщIэдзэм ирихьэлIа зыгъэпсэхугъуэ махуэхэм къриубыдэу ­Къэбэрдей-Балъкъэрым и «Iуащ­хьэмахуэ» курортым зыщагъэпсэхуащ цIыху мин 37-м икIи нэгъабэ и апхуэдэ пIалъэм щыIа бжыгъэхэм нэхърэ ар процент 30-кIэ нэхъыбэщ. Апхуэдэ хъыбар къитащ Кавказ.РФ-м.

Накъыгъэм и 9 за­къуэм,ТекIуэныгъэ Иным и махуэр щагъэлъапIэм, курортым щыIащ турист мини 5-м щIигъу. Абыхэм щхьэкIэ гукъинэжу нэгузыужь программэхэр зэхагъэуват, концертхэр, гъэлъэгъуэныгъэ­хэр, лъэпкъ IэпэIэсэхэм я мас­тер-классхэр хэту, «губгъуэ Iэнэхэри» абдеж щы­хуагъэуват.
ЖыпIэнурамэ, гъэмахуэр къызэрыблагъэм щхьэкIэ къэ­мынэу, «Iуащхьэмахуэ» ку­рортым иджыри бгым лыжэкIэ укъыщежэх хъунущ, апхуэдэ Iэмал щыщыIэ лъэхъэнэр абы и кIэм щынэсакъым. Псалъэм папщIэ, накъыгъэм хиубыда гуфIэгъуэ махуэхэм сноупаркым абы лэжьэн щыщIидзащ. Ар ­метр 4000 зи лъагагъ щIыпIэм тетщ. А псом къадэкIуэу, Урысей Федерацэм бгы-лыжэ спортымкIэ и командэ къыхэхам хэтхэм бгым и джабэ нэкIухэм зыщагъэсэнущ мы мазэм. Абы нэмыщI, бадзэуэгъуэм ди республикэм и къурш уардэм щы­хьэщIэнущ фристайлымкIэ ди къэралым и спортсмен нэхъ лъэщхэр.
Гъэмахуэр къызэрысу Iуащ­хьэмахуэ лъапэ экологие лъагъуэхэр щрагъэжьэнущ, псори зэхэту километр 70 я кIыхьагъыу. Абыхэм хохьэ «105-нэ пикет», «ТекIуэныгъэм и лъагъуэ» тхыдэ ­лъагъуэхэри. 
Хабзэ зэрыхъуауэ, гъэмахуэкум ирихьэлIэу «Elbrus World Race» фIэщыгъэр ­зе­зыхьэ, къэжыхьынымкIэ фес­тивалыр Iуащхьэмахуэ лъапэ щызэхашэнущ. Абы хыхьэ гъуэгуанэхэм нэхъ кIыхь дыдэу хэтыр бгым и ­хъуреягъкIэ къекIуэкIырщ, километри 137-рэ хъууэ. 
«Iуащхьэмахуэ» бгы курортыр Iуащхьэмахуэ лъапэм щыIэщ икIи дуней псом фIыуэ къыщацIыху. Мыбдеж бгы-лыжэ гъуэгу зэхуэмыдэу 10 щолажьэ икIи лыжэкIэ къыщыбжыхь хъу бгыхэм ящыщу абы нэхърэ нэхъ ин УФ-м щыIэкъым. ЛыжэкIэ къэзыжыхьхэр нэхъ лъагэ дыдэу дэзышей кIапсэ гъуэгур, «Гарабаши»-р, километр 3847-кIэ Iэтащ. 
ЩIымахуэр, къежэхыгъуэ лъэхъэнэр зэрикIыу, цIыху куэдым яфIэфIу зыщагъэп­сэху нэгъуэщI унэтIыныгъэ­хэм, къыщакIухь экологие лъа­гъуэхэм лэжьэн щIадзэ. 
ХЬЭЩОКЪУЭ Алыдж.