Шимал Осетия-Аланияны Моздок шахарында къытхарыучуланы араларында «Автомобиль транспортда къыйын болумлада авария-къутхарыу ишлени тамамлауда СКФО-ну эм иги къаууму» деген аты бла эришиу бардырылгъанды.

Анга округну битеу да регионларындан кеслеринде айырмалы болгъан къауумла къатышхандыла. Ала бийик усталыкъларын, быллай кезиуледе апчымай, терк ишлегенлерин да ачыкълагъандыла, судьяла багъа бичгенде,  ала къаллай бир заманны къоратханларына, халатларына да къарагъандыла. Уллу эришиулюкде МЧС-ни Элбрус бийик-тау излеу-къутхарыу къаууму экинчи жерни алгъанды.

Хорлагъанланы ведомствону Осетияда Баш управлениясыны таматасыны орунбасары Владимир Бутэнко алгъышлагъанды, ол къауумлагъа билимлери, сынамлары, хорламгъа итиниулюклери ючюн да ыразылыгъын билдиргенди. Алчы жерлеге чыкъгъанла кубокла, майдалла эм дипломла бла саугъаланнгандыла.

Кульчаланы Зульфия.