2025 гъэм и япэ мазищым къриубыдэу УФ-м и щIыналъэхэм ящыщу 71-м я хьэрычэтыщIэ мини 2-м нэблагъэм МСП.РФ-м бжыгъэ лъабжьэ зиIэ и платформэр къагъэсэбэпу къэралым кредит мащIэхэр зыт и IуэхущIапIэхэм щIыхуэу псори зэхэту сом меларди 5,1-рэ къыIахащ. Нэгъабэ и апхуэдэ пIалъэм щыIа бжыгъэхэм елъытауэ хуэди 2,5-кIэ абы хэхъуащ.
«МСП.РФ-м бжыгъэ лъабжьэ зиIэ и платформэр хьэрычэтыщIэхэм я дежкIэ Iэмал хъарзынэщ абыхэм заужьынымкIэ, ахэр дэIыгъынымкIэ, IэнатIэхэм ахъшэ къешэлIэнымкIэ. ИкIи апхуэдэ Iуэху щытыкIэм и фIыгъэкIэ, зэрыжаIэу, уи унэ ущIэсу лъэIур банкым хуебгъэхь хъунущ, укъызэрикIым тещIыхьауэ фейдэ хэлъу узыхуеину ахъшэм хуэдизи къыпхуеIыхынущ. Абы щхьэкIэ гугъуехь куэд ухэтынукъым, дэфтэрхэр псори хъэзырщ, тыншуи пхупхыгъэкIуэнущ», - жиIащ МСП Корпорацэм и унафэщI Исаевич Александр. 
Апхуэдэуи абы къыхигъэщащ щIыналъэхэм я хьэрычэтыщIэхэм я нэхъыбэм кредитхэмкIэ я лъэIухэр интернеткIэ банкхэм зэрыщIалъхьэр.
Кредит мащIэ хуэныкъуэ хьэрычэтыщIэхэм я нэхъыбэр зыхэтыр щэху-къэщэхумрэ (кредит мащIэ къэзыщтэхэм и процент 24-р абыхэм къалъос) цIыхухэм Iуэхутхьэбзэхэр яхуэщIэнымрэщ (процент 22-рэ). Абыхэм хохьэ мэкъумэш IэнатIэм пэрытхэри (процент 20). 
Интернетыр къагъэсэбэпу кредит мащIэхэр банкхэм къыщызыщтэ хьэрычэтыщIхэр нэхъыбэу здэщыIэр Краснодар крайрщ (сом мелуан 520-рэ). АдэкIэ къокIуэ Ростов областыр (сом мелуан 432-рэ), Удмуртиер (сом мелуан 317-рэ), Тэтэрстаныр (сом мелуан 292-рэ), Кърымыр (сом мелуан 286-рэ). МСП.РФ-м бжыгъэ лъабжьэ зиIэ платформэр мэлажьэ «Зэхьэзэхуэр зи лъабжьэ экономикэ лъэщ» лъэпкъ пэхуэщIэм ипкъ иткIэ, УФ-м Экономикэ зыужьыныгъэмкIэ и министерствэм и нэIэ щIэту.

ХЬЭЩЫКЪУЕЙ Олег.