Герийланы Владимирни жашы Аслан Нагорный Карабахда мамырлыкъны жалчытханды, Чеченде бандитлеге къажау тургъанды, энчи аскер операциягъа уа ол кесини ыразылыгъы бла баргъанды. 

Аслан КъМР-де МВД-да  уголовный розыск управленияда къуллукъ этгенди кёп жылланы. Анда бютюнда уллу аманлыкъланы тинтирге, аманлыкъчыланы тохташдырыргъа тюшгенди.  Аны себепли сауут бла хайырлана биледи. Бу усталыкъ анга СВО-ну кезиуюнде кесини, нёгерлерини жанларын сакъларгъа кёп кере болушханды.

- СВО-гъа дери уа тёрт урушха къатышханма. Озгъан ёмюрню 90-чы жылларында Бакуда милицияны школунда   окъуй тургъанлай курсубузну саулай Нагорный Карабахха Азербайджанны бла Арменияны араларында мамырлыкъ жумушланы толтурургъа ийген эдиле.  Ызы бла Чеченде эки кампания, сора Абхазия,  Шимал Осетияны бла Ингушетияны араларында къаугъа башланнганда, эки халкъны арасында тургъанбыз,- дейди Аслан. 

СВО-гъа уа ол кеси ыразылыгъы  бла баргъанды. Быллай сайлау нек этгенин ангылата, хар адам да билген ишин толтурургъа керекди, дейди. Ол а сауутну, сермешни бардырыуну жорукъларын билгени, право низамны тохташдырыуда сынауу уллу болгъаны ючюн энчи аскер операциягъа къатышыуну тюзге санагъанды.  «Дагъыда   ары барып, бир жаш адамны окъуна жанын сакълаялгъан эсем,  бек ыразыма»,-дейди ол.  

Бизни жигитибиз душманны окъ атыуун жокъ этиу бёлюмню командири болуп къуллукъ  этгенди Запорожье жанында.

Жангылыкълагъа  къарасанг, шёндю уруш бардырыу кёкге кёчгенди дерчады - коптерледен, беспилотникледен атып...   Карабах, Чечен да бу операция бла тенглешдиргенде юйрениулеге ушайдыла, дейди ушакъ нёгерибиз. Коптер учду, разведка бардырды, ол кёргюзтген координатлагъа артиллерия от ачды.

Аслан кеси да коптерден атылгъан топдан  жаралы болгъанды. «Биргеме нёгерим да  жарала алгъан эди, алай ала асыры ауурдан, ол жан бергенди. Алайдан сюркелип да кеталлыкъ эдим, алай нёгерими  къоялмагъанма,  сау кюнню къатында болгъанма.   Аны ёлюгюн чыгъарама деп, энтта бир жашыбызны тас этсек жарарыкъ тюйюл эди»,-дейди ол.

- Фронтда таулу, оруслу, башха миллетли  деп юлешиниу жокъду. Анда тапхан нёгерлик къурчдан да къатыды.  «Жаралы болгъунчу мен таматалыкъ этген къауумда  бир адамны да тас этмегенме. Жашла да   тынгылагъандыла,  хурмет бергендиле, сау болсунла. Нёгер дейсиз. Ма бир юлгю. Бир жол ауузланыргъа хазырлана турабыз. Эки жаш бир бири бла, ротный муслийманлыды, чыгъармайыкъ шёндю, дегенлерин эшитеме. Не болгъанды деп сорсам, алагъа   ДНР-ден аскерчиле сало бергендиле. Ала уа мени диниме хурмет этип, аны чыгъарыргъа уяладыла. Ма аллай аз затчыкълагъа дери хурмет этилгенди бир бирге»,-дейди ол. 

Герийланы Аслан  аскерчилени арасында эм даражалы «За отвагу» майдал бла саугъаланнганды. Дагъыда  «За отличие в охране общественного порядка» майдал бла да белгиленнгенди. Аны бла уа  1998 жылда  уголовный розыскда ишлегенинде аманлыкъчыла жесирге тюшген инсанланы эркин этиу операцияны бардыргъаны ючюн саугъаланнганды.  «Москвадан 5 къырал автоинспектор   малгъунланы къолларына тюшген эдиле. Аланы табып, эркин этгенибиз ючюн тийишли болгъанма майдалгъа. Озгъан ёмюрню 90-чы жыллары   къыйын кезиу болгъанды. Адамланы жесирге алыула, ёлтюрюуле… Псыгансуучу жашны да  эркин эталгъанбыз жесирден. Ол 8 ай чакълы тургъанды аманлыкъчыланы къолларында»,-дейди ол.

«За отвагу» майдал  шёндю Украинада къуллукъ ючюн берилгенди.   Дагъыда «За ратную доблесть» эм «За мужество и отвагу» майдалла бла да саугъаланнганды.

Жарасына да къарамай, бюгюнлюкде Герий улу жамауат иш бла тири кюрешеди, жаш адамла бла тюбешеди,  тюрлю-тюрлю жыйылыулада болады.  Ёсюп келген тёлюню Ата журтубузгъа сюймекликге юйретиу  бютюнда керекди, магъаналыды, деп акъыл этеди ол.  «Сабийле уа тюзлюкню билирге керекдиле. Бизни башха Ата журтубуз жокъду, кесибиз къаты болмасакъ, аны бир адам да къорууларыкъ тюйюлдю»,-дейди ол.

«Бизни башха Ата журтубуз жокъду» Герийланы Владимирни жашы Аслан Нагорный Карабахда мамырлыкъны жалчытханды, Чеченде бандитлеге къажау тургъанды, энчи аскер операциягъа уа ол кесини ыразылыгъы бла баргъанды. Аслан КъМР-де МВД-да уголовный розыск у