Озгъан ыйыкъда Черкесск шахарны Сурат галереясында кийизле этген белгили устабыз Джаппуланы Езетханны бла жаш суратчы Бабаланы Индираны бирикдирилген кёрмючлери ачылгъанды. Ол къарачай-малкъар халкъны туугъан жерине къайтхан кюнюне жоралап къурагъанды.

Кёрмючню къууанчлы ачылыууна КъЧР-ни миллетлени ишлери, асламлы коммуникацияла эм басма министрини орунбасары Хубийланы Ислам, Сурат галереяны таматасы Хасанланы Ханапий, политик Эркенланы Ахмат эм дагъыда башхала къатышхандыла. 

Фондну таматасы Биттирланы – Къочхарланы Людмила айтханнга кёре, халкъыбыз къачан да фахмулу тиширыуладан бай болгъанды. Хар ауузда, элде да аллайланы атлары кенг белгили эдиле. 

– Джаппуланы Езетхан миллетибизни кийизле жарашдырыу усталыгъына ёсюп келген тёлюлени  юйретиу бла къаты кюрешеди. Аны эм биргесине ишлеген тиширыуларыбызны хайырларындан бюгюнлюкде къарачай-малкъар халкъны къол усталыгъыны бир тюрлюсю жангыдан кюч алып барады. 

Бабаланы Индира уа фахмулу жаш суратчы къызыбызды. Бу жолгъа дери аны ишлери бла адамла миллет фестивальларыбызда шагъырей бола тургъандыла. Энди уа анга да жол ачар заман жетгенди деп, айтырчабыз, - деп чертгенди Людмила Таусоевна. 

Бу кёрмючде 32 кийизни  бла 20 суратны  кёрюрге боллукъду. Бабаланы Индира айтханнга кёре, бу аны биринчи кёрмючюдю.

– Бек жаратханма. Бу ишге къыйын салгъанла  сау болсунла. Быллай кёрмючге биринчи кере къатышханым себепли, хар не да  сейир эди манга, - дегенди суратчы. 

Бабаланы Индира Акъ-Сууда туугъанды. Сурат ишлеуге къачан да энчи эс бёлгенди.  КъМКъУ-ну дизайн колледжин бошап, «Дизайнер интерьеров» усталыкъны алгъанды. Бюгюнлюкде кесини студиясын ачып, миллет накъышларыбызны, тукъум тамгъаларыбызны, тауларыбызны ишлерге сюйгенлени юйретеди.  Аны кесини да кёп суратлары уллу шахарлада энчи коллекциялада  бардыла. 

Черкесск шахардагъы кёрмюч 16 майгъа дери ишлерикди.

Таппасханланы Аминат.